جام کوردی – کە ویستت بەباشی لە تواناییە شاراوەکانی جیهانی ژنێک تێ بگەی ئاوڕێک لە کاراکتەری پەریزاد بدەوە و بێدەنگییەکەی بکە بە پێوەری باوەڕی پتەو بە پلانێک کە بۆ بەجێهێنانەکەی دەبێ شەش ساڵی ڕەبەق خۆت نەبی و ئازاری خۆشاردنەوەیەکی دڵخوازانە بە گیان بکڕی.
کە ویستت باوەڕ بە خۆشەویستییەکی ئەفسانەیی بێنی سۆراغێکی شارێ بکە و لەسەر پشتی خەدەنگەکەی بیبینە چۆن بەرەو دوندی شاخان هەڵ دەکشێت تاکو دەستی ئەغیارانی پێ نەگات.
کە ویستت پێوەری وەفادارییەکی هەمەلایەنە بە خۆت و وڵات و ئازادی و مناڵت بێتە دەست هەمدیسان بڕۆوە سۆراغی تاج قەمەری شنۆیی هەڵوەدای قەزبێن و سپەهان و لە دەریای خۆشەویستی و بەرپرسیاریدا نوقم بە.
کە ویستت شینگێڕی ڕێهەڤاڵی ژینت بی بڕۆ سەیری دیمەنی شینگێڕیی پەریزاد بکە و گوێ لە زایەڵەی هاوارە بەرزەکانی بگرە و لەودیو چەپەرەکانی مێژووەوە وەفا و ئەڤین و ژیانەوە بکەرەوە بە میوانی دەروونی ماندووت و هەستی بریندارت.
کە ویستت تراژێدیای شکست بە هەموو لایەنەکانییەوە وێنا بکەی و هاواری تەنیایی و بێکەسیت بە زەقی ببینی لەگەڵ کاک ئاڵی، چاوەڕوانی وەڵامی هەرگیز نەهاتووی پسوولەکانی فریادڕەسیی بە و بۆ دواڕۆژەکانی داکۆکی لە کەرامەت و ئازادی بگری و شیوەن بگێڕە.
کە ویستت تامی مزری دەقێک بکەی کە گوزارە لە ئەڤین، شۆڕش، سەربەخۆیی، خەبات، ئاوارەیی، مرۆڤ، دوژمن، دێو، درنج، فریشتە، سروشت، ئایین، … دەکات بڕۆ لە بەرەبەرەی ڕۆژی جیهانیی زمانی دایکدا (بەردینە) بکڕە و لەسەر دەلاقەی ماڵەکەتی دانێ و لە هەموو بۆنەیەکی خۆش و ناخۆشدا لاپەڕەیەکی هەڵ دەوە و بە دەنگی بەرز بیخوێنەوە و دڵت بسپێرە بە بەردینە و چێژ وەرگرە لە دەقێک کە بە نەرمیی حەریرە، مۆسیقای شنەی کۆسارانەە، خوناوەی بەهارانە، گەرمای ژێر کورسیی زستانانە، ئارامیی شەوانی پاییزە، ڕووناکیی تریفەی مانگەشەوانە، زولالیی ڕووبارانە و سەوزایی پێدەشتی بەهارانە!
کتێبەکە لەوێ دابنێوە و سبەی و سبەی شەو و سبیانێ و سبیانێکانی دیکەش لاپەڕەیەکی دیکە هەڵ دەوە و لەگەڵ زمان بچووە جێژوانی خۆشەویستی و چێژ لە بوونت وەرگرە!
