سەرچاوەیەکی ئاگاداری عێراقی پیلانێکی نوێی ئەمریکای ئاشکرا کردووە بۆ دابینکردنی بۆشایی ئەمنی لە ناوچە سنورییەکانی ئەم وڵاتە و سوریا بە ئامانجی جێگیرکردنەوەی چەکدارانی گرووپی تیرۆریستی داعش لە ناوچە بیابانییەکانی پارێزگای ئەنبار و ڕێکخستنەوەی سەر لە نوێی ئەم گرووپە تیرۆریستییە.
بە پێی ڕاپۆرتی جام کوردی، سەرچاوەیەکی ئاگادار پیلانێکی ئەمریکای بۆ جێگیرکردنەوەی تیرۆریستانی داعش لە بیابانەکانی پارێزگای ئەنبار لە عێراق ئاشکرا کردووە و ڕایگەیاندووە کە هێرشەکانی ئەم دواییەی ئەمریکا لە ناوچە سنورییەکانی نێوان عێراق و سوریا بە ئامانجی ئاسانکاری بۆ هاتووچۆی چەکدارانی داعش بووە.
ئەو سەرچاوە ڕایگەیاندووە کە فڕۆکەکانی ئەمریکا و ڕژێمی زایۆنیستی لە ڕۆژانی ڕابردوو چەند جار هێرشیان کردووەتە سەر هێزەکانی سوریا و هاوپەیمانەکانی ئەوان و بە تایبەت هێرشەکان ناوەندی فەرماندەیی کۆنتڕۆڵی سنوری و ناوەندی ئەمنی فەرماندەیی سوریای لەو ناوچانە کردووەتە ئامانج. ئامانجی هێرشەکانیش پاشەکشەی ئەو هێزانە و چۆڵکردنی ناوچە سنورییەکان لە دیوی سوریاوە بووە.
بە وتەی ئەو سەرچاوە ئاگادارە، فەرماندەیی سەربازی ئەمریکا هەوڵ دەدات درێژە بە هێرشەکانی لە دژی حەشدی شەعبی بدات و ئەمەش سەرەتای هێرشێکی سەربازییە کە لە دژی هێزە جێگیرکراوەکانی حەشد لە ناوچە سنورییەکانی عێراق لە گەڵ سوریا دەکرێت. لە ئەگەری مسۆگەربوونی ئەم ئامانجەش، کەلێنێکی ئەمنی و دەرفەتێکی گەورە بۆ چەکدارانی داعش و جێگیرکردنەوەی ئەوان لە ناوچە بیابانییەکانی ئەنبار دێتە پێشەوە و ئەمریکییەکان بەم شێوازە دیسانەوە دەچنە خزمەتی گرووپی تیرۆریستی داعش و لە هەمان کاتدا عێراق ڕوبەڕوی قەیرانێکی ئەمنی نوێ دەکەنەوە.
وتیشی: زانیارییە هەواڵگرییەکان پیشان دەدات کە هێزەکانی ئەمریکا و هێزەکانی سوریای دیمۆکرات زیاتر لە 12 هەزار ئەندامی داعشیان لە کەمپی هول کە لە سەرکردەکانی عەرەب و نەتەوەکانی دیکەن، ئازاد کردووە.
لە لایەکی دیکەوە، فازڵ جابر ئەندامی هاوپەیمانی فەتح لە پەرلەمانی عێراقیش ئەوەی پشتڕاستکردەوە کە بەردەوامی هێرشە ئاسمانییەکان لە ناوچە سنورییەکانی عێراق و سوریا بە ئامانجی لاوازکردنی دۆخی کۆنتڕۆڵکراوی ئێستا لە بیابانەکانی ئەنبار و جزیرە و سەرەتایەکیشە بۆ گەڕانەوەی داعش و بەهێزبوونی لە خاکی عێراق.
ناوبراو وتی: هەر چاودێرێک بە ئاسانی لەمە تێدەگات کە ئامانجی ئاشکرای بەردەوامبوونی هێرشە ئاسمانییەکانی ئەمریکا و ڕژێمی زایۆنیستی لە دژی ناوچە عێراقییەکانی هاوسنوری سوریا و هەورەها ناوچە سنورییە هاوبەشەکان تەنیا بە ئامانجی گەڕانەوە و بەهێزکردنەوەی داعشە و ئەگەر بەهێزەوە ڕوبەڕوی ئەم پیلانگێڕییە نەبینەوە، جارێکی دیکە بە هۆی داعشەوە ئاسایشی عێراق ڕوبەڕوی مەترسی جیدی دەبێتەوە.
جابر داوای لە حکومەتی عێراق و فەرماندەیی هێزە چەکدارەکان کرد تا بە زیاترکردنی هێزە ئەمنییەکان لەو ناوچانە، ڕێگری لەم پیلانگێڕییە بکەن.
لەو کاتەوە کە عێراق سەرکەوتنی دژ بە داعشی ڕاگەیاند، ئەمریکا لە بەرامبەر گرووپەکانی خۆڕاگری هەوڵ دەدات کۆنتڕۆڵی ناوچەکانی ئەنبار بکات بەڵام هێزەکانی تەنیا لە بنکەی عەین ئەسەد جێگیر کراون و لە ڕاستیدا هێزەکانی حەشدی شەعبی، سوپا، پاسەوانی سنور، پۆلیسی خۆجێی و حەشدی عەشایرین کە کۆنتڕۆڵی پارێزگاکەیان کردووە و سەرەڕای گوشارەکانی واشنتن بۆ دوورکەوتنەوەی حەشدی شەعبی لە ڕۆژئاوای عێراق و ئاسانکاری بۆ هاتووچۆی چەکدارانی داعش، هێشتا کۆنتڕۆڵی ناوچە سنورییەکانی عێراق و سوریا و بە دیاریکراوی پارێزگای ئەنبار لە دەستی هێزەکانی حەشدی شەعبی و هێزە ئەمنییەکانی دیکەی عێراقدایە.
