بە پێی ڕاپۆرتی جام کوردی، دکتۆر ئەحمەد ئیسماعیلزادە شارەزا لە بواری تەندرووستی، سەبارەت بە سوودەکانی بەڕۆژووبوون بۆ تەندرووستی جەستە ڕایگەیاند: توێژینەوە زانستییەکان دەریانخستووە کە بەڕۆژووبوون نەک تەنیا زیان بە جەستە ناگەیەنێت، بەڵکوو دەتوانێت کاریگەری ئەرێنی لە سەر تەندرووستی جەستەیی هەبێت.
ناوبراو ڕایگەیاند: بە پشتبەستن بە بەڵگەی زانستی و چەندین لێکۆڵینەوە، سوودەکانی بەڕۆژووبوون بۆ تەندرووستی بە تەواوی سەلمێنراوە. بەڵام ئەو کەسانەی کە هەندێک کێشەی پزیشکییان هەیە دەتوانن بە پێی ڕای پزیشکەکە لە بەڕۆژووبوون بەخشراو بن. ئەو کەسانەی کە تەندرووستی باشیان هەیە نەک تەنیا کێشەیان نییە لە بەڕۆژووبوون، بەڵکوو دەتوانێت کاریگەری ئەرێنی لە سەر تەندرووستییان هەبێت.
ئەو شارەزایە له درێژەدا ڕایگەیاند: بەڕۆژووبوون یارمەتی کەمکردنەوەی چەوری جەستە دەدات. ئەم کەمبوونەوەی چەورییە لە کۆتاییدا دەبێتە هۆی کۆنتڕۆڵکردنی پەستانی خوێن و دابەزاندنی شەکری خوێن و باشترکردنی ئاستی چەوری خوێن. دابەزاندنی کێش بە هۆی بەڕۆژووبوون دەتوانێت ڕۆڵێکی کاریگەری هەبێت لە باشترکردنی تەندرووستی خەڵک، بەتایبەتی ئەوانەی جگەریان چەورە.
وتیشی کە توێژینەوەکان دەریانخستووە کە بەڕۆژووبوون نەک تەنیا دەبێتە هۆی ئارامی مێشک و کەمبوونەوەی فشار، بەڵکوو هەوکردن لە جەستەدا کەمدەکاتەوە. کاتێک هەموو ئەم سوودانە پێکەوە دەبینین، دەگەینە ئەو ئەنجامەی کە بەڕۆژووبوون دەتوانێت کاریگەری ئەرێنی لە سەر تەندرووستی جەستەیی و دەروونی هەبێت و لە درێژخایەندا یارمەتی پاراستن و باشترکردنی تەندرووستی خەڵک دەدات./.
