ئارێز عەبدوڵڵا لە وتووێژی لە گەڵ پەیامنێری جام کوردی، وتی: تورکیا پێی وایە هاووڵاتیانی هەرێمی كوردستان بە تەواوی مافەكانی خۆیان هەبێت و كوردستان پێشكەوتوو بێت، كاریگەری بۆ سەر كوردانی توركیا دەبێت و كوردی توركیا هاندەدرێن بۆ ئەوەی ئەوانیش مافەكانیان دەستەبەر بكەن، بۆیە توركیا دژی ئەوەیە.
ناوبراو وتی: ئەوەی دیارە سیاسەتێكی دوژمنكارانەی حکومەتی توركیا بەرامبەر كورد بە گشتی هەیە، بەڵام پارتی كرێكارانی كوردستانی كردووەتە پاساو بۆ ئەوەی بێتە ناو خاكی هەرێمی كوردستانەوە، ئەگینا ئەوەی دەبینرێت داگیركردنە.
ئەو نووسەرە ئاماژەی بەوەشكرد: توركیا سوود لەو بێتواناییەی عێراق و بێدەنگی هەرێمی كوردستان وەردەگرێت، بەداخەوە لە داگیركاری توركیادا هەندێك لایەنی دیكەش هەن كە بەرژەوەندی خۆیان لەوەدا دەبینن توركیا بەشێك لە هەرێمی كوردستان داگیربكات و بەلایانەوە ئاسایی بێت، ڕەنگە لە ناو عێراقیشدا تاڕادەیەك ئەو ئاراستەیە هەبێت كە پێیانخۆشە هەرێمی كوردستان سەقامگیر نەبێت و پێشنەكەوێت.
ئارێز عەبدوڵڵا لە درێژەدا وتی: لە هەرێمی كوردستان حكومەت لای پارتییە و بادینان لە ژێر هەژموونی پارتیدایە و دەرگایان بۆ توركیا كردووەتەوە و ئەویش ڕۆژ لە دوای ڕۆژ خاكی زیاتری هەرێمی كوردستان داگیر دەكات و ژمارەی ئەو كەسانەی بە چەك و درۆن و تۆپی توركیا شەهید دەبن، زیاتر دەبن.
ناوبراو وتی: بە دڵنیاییەوە توركیا بە سووك و ئاسان لە خاكی هەرێم ناكشێتەوە و دەستبەرداری ئەو ناوچانە نابێت كە داگیری كردوون.
وتیشی کە توركیا حەزناكات هەڵبژاردن لە هەرێمی كوردستان بكرێت، بەڵام ئەو بەشەی خاكی كوردستان توركیا داگیری كردووە مەترسییەكە زۆر گەورە دەكات و مەترسییە لە سەر پرۆسەكە، بەڵام ئێمە پێمانوایە هەڵبژاردن هەر دەكرێت، چونكە دەوڵەتی عێراق هەیە و كۆمەڵگای نێودەوڵەتیش هاوكارمانە بۆ ئەوەی هەڵبژاردنەكە بكرێت./.
