دکتۆر هەڵەت ڕەشید عەبدوڵڵا، مامۆستای زانکۆ و دکتۆرا لە جوگرافیای سرووشتی، لە وتووێژی لە گەڵ پەیامنێری جام کوردی، سەبارەت بە سیاسەتی ئاویی تورکیا و کاریگەرییەکانی لە سەر عێراق، وتی: تورکیا دەیان ساڵە پرۆژە ئاوییەکانی بە درووستکردنی کۆمەڵە بەنداوێک بۆ گلدانەوەی ئاوی هەر دوو ڕووباری دیجلە و فۆرات و بە ئامانجی وەبەرهێنانی کارەبا، گەشتوگوزار و ئاودێری دەستپێکردووە و لە داهاتوودا کاریگەرییەکانی ئەو پرۆژانەش لە سەر عێراق دەردەکەوێت.
ناوبراو لە شرۆڤەی کاریگەرییەکانی ئەو پرۆژانەی تورکیا لە سەر هەرێمی کوردستان و عێراق وتی: کێشەی ئاو لە عێراق تا ڕادەیەک بەراورد بە هەرێمی کوردستان باشترە، لە بەر ئەوەی کە ژمارەی بەنداوەکانی عێراق لە هەرێم زیاترە و لە کوردستان تەنیا دوو بەنداوی سەرەکی هەیە، بەنداوەکانی دووکان و دەربەندیخان کە سەرچاوەکانیان لە ئێرانە، بەڵام عێراق بە زۆربوونی بەنداوەکان دەتوانێت تا ڕادەیەک خۆی لەم سیاسەتە بپارێزێت.
ئەو شارەزای جوگرافیای سرووشتییە وتی: ڕەنگە لە داهاتوودا تورکیا بە پارە یان بەرامبەر بە نەوت، ئاو بە عێراق بدات، عێراق و هەرێمی کوردستان بۆ چارەسەرکردنی ئەم کێشەیە پێویستیان بە درووستکردنی بەنداوی زیاتر هەیە، بە تایبەت بۆ هەرێمی کوردستان پێویستە بە تەواوکردنی بەنداوی بێخمە هەوڵی چارەسەرکردنی کێشەی کەم ئاوی لە داهاتوودا بدرێت.
دکتۆر هەڵەت ڕەشید عەبدوڵڵا وتی: ئاشکرایە کە تورکیا مەبەستی گەورەی لە پشت گلدانەوەی ئاوەوە هەیە و دەیەوێت بۆ بەرژەوەندی سیاسی و بازرگانی کەڵک لەو پرۆژانەی وەربگرێت، ئەگەری ئەوەش هەیە کە لە داهاتوو بۆ دژایەتی پەکەکەش بەکاری بێنێت، بە واتای ئەوەی کە عێراق ناچار بە دەرکردنی پەکەکە لە ناو خاکی خۆیدا بکات یان کەمپەکانی پێ دابخات.
ناوبراو سەبارەت بە ئەرکی هاووڵاتیانی هەرێمی کوردستان و عێراقیش لە ڕوبەڕوبونەوەی ئەم کێشەیە وتی: ئەرکی هاووڵاتی ئەوەیە کە بە ووشیارییەوە ئاو بەکار بێنێت بەڵام ئەرکە گەورەکە لە سەر حکومەتە کە پرۆژەکانی بەنداو و ئاودێری لە کەرتی کشتووکاڵدا بخاتە بواری جێبەجێکردنەوە./.
