بە پێی ڕاپۆرتی جام کوردی، عادل شەرکس جێگری سەرۆکی بانکی ناوەندیی ئەردەن پێشبینی ئەوەیکرد کە داهاتی ئەم وڵاتە لە کەرتی گەشتیاری تا کۆتایی ساڵ دەگاتە نزیکەی 4 ملیار دۆلار کە بەراورد بە ساڵی 2020 لە سەدا 81 گەشەی کردووە.
ناوبراو لە کۆبوونەوەیەکی هاوبەش لە گەڵ لێژنەی دارایی پەرلەمانی ئەردەن بۆ تاوتوێکردنی بودجەی ساڵی 2022 وتی: داهاتی گەشتیاریی ئەردەن لە ماوەی 11 مانگی ڕابردوو لە سەدا 78.5 گەشەی هەبووە و پێشبینی دەکرێت ئەو ڕێژەیە تا کۆتایی ساڵ بگاتە لە سەدا 81.6.
ئەو بەرپرسەی ئەردەن وتی کە گەشتیاری لەمساڵ نزیکەی 3 ملیار و 500 ملیۆن دۆلار تا 4 ملیار دۆلار داهاتی هەبووە.
ئەردەن بە هۆی نەبوونی سەرچاوەکانی نەوت و گازەوە گرنگییەکی زۆر بە کەرتی گەشتیاری دەدات./.
