بە پێی ڕاپۆرتی جام کوردی، پاش حەماسەتە گەورەکەی بەشداری کەم وێنەی خەڵکی ئێران لە هەڵبژاردنەکانی سەرۆکایەتی کۆمار، حەزرەتی ئایەتووڵا خامنەیی ڕێبەری مەزنی شۆڕشی ئیسلامی لە پەیامێکدا گەلی ئێرانیان بە براوەی هەڵبژاردنەکان ناو برد.
دەقی پەیامەکەی ڕێبەری مەزنی شۆڕشی ئیسلامی ئێران لە درێژەدا هاتووە:
بسم اللە الرحمن الرحیم
گەلی گەورە و سەربەرزی ئێران
بەشداری کەم وێنە و پڕ لە شانازی لە هەڵبژاردنەکانی 28 ی جۆزەردان، لاپەڕەیەکی زێڕینی دیکەی لە سەر شانازییەکانی ئێوە زیاد کرد. لە هەلومەرجێکدا کە بە هەر هۆکارێک دەیتوانی کاریگەری لە سەر ڕێژەی بەشداری خەڵک دابنێت، دیمەنەکانی بەشداری کەم وێنەی ئێوە و ئامادەبوونتان لە ناوەندەکانی دەنگدان لە سەرتاسەری وڵات، هێمایەکی ئاشکرای ئیرادەی بەهێز و دڵی پڕ لە هیوا و چاوانی بێدار بوو.
براوەی هەڵبژاردنەکانی هەینی، گەلی ئێرانە کە جارێکی دیکە لە بەرامبەر بانگەشەی میدیاکانی بەکرێگیراوی دوژمن و پیلانگێڕی کاڵفامان و ناحەزان، هێزی خۆیان پیشاندا و ئامادەبوونی خۆیان لە گۆڕەپانی سیاسی وڵات بە جیهان پیشان دایەوە. نە گلە و گازندەی دۆخی دژواری ژیان بە تایبەت لای چینی هەژار و کەم داهات، نە کاریگەرییەکانی نەخۆشیی کۆرۆنا، نە دژایەتی ئەوانەی کە چەندین مانگە هەوڵی پاشگەزبوونەوەی خەڵک دەدەن و نە تەنانەت هەندێک کەموکوڕی لە ڕۆژی دەنگدان لە چەند کاتژمێرێکی بەڕێوەچوونی پرۆسەکە، هیچ یەک لەوەدا سەرکەوتوو نەبوو کە بە سەر ئیرادەی گەلی ئێراندا زاڵ بێت و هەڵبژاردنەکانی ئەمجارە تووشی کێشە بکات.
لە بەرامبەر ئەم سەرکەوتنەی گەلی ئێران سوپاسی خودای گەورە دەکەم، پیرۆزبایی لە گەلی گەورەی ئێرانیش دەکەم، پیرۆزبایی لەوانەش دەکەم کە بوونەتە براوەی هەڵبژاردنەکانی سەرۆکایەتی کۆمار و ئەنجومەنەکانی شار و گوند، ستایشکردنی ئەم گەلە بەوەفایە و خزمەتکردنی ئەوان بەردەوام وەبیر دێنمەوە، ڕێز لەم دەرفەتەی خزمەتگوزاری بە گەلی ئێران بگرن و لە هیچ کاتیشدا خودای گەورە لە بیر نەکەن.
دەستخۆشی لە ئەنجومەنی پاراستنی دەستوور، وەزارەتی ناوخۆ و سەرجەم هێزە ئەمنییەکان دەکەم کە بە چەشنێک ڕۆڵیان لە سەرکەوتنی ئەم ئەزموونەدا هەبووە.
سەید عەلی خامنەیی
29 ی جۆزەردانی 1400 ی کۆچی هەتاوی./.
