بە پێی ڕاپۆرتی جام کوردی، بۆ یەکەم جار لە پاش کودەتاکەی ساڵی 2016، 103 ئەفسەری خانەنشینکراوی هێزی دەریایی سوپای تورکیا لە ڕاگەێندراوێکدا بە توندی ڕەخنەیان لە بڕیارەکەی ڕەجەب تەیب ئەردۆغان سەبارەت بە کشانەوە لە ڕێکەوتنی مونترۆی تایبەت بە کردنەوەی ڕێڕەوێکی ئاوی نوێ لە ئیستەنبووڵ گرتووە.
ئەو ڕێکەوتنە ساڵی 1936 لە نێوان تورکیا و هێزە گەورەکانی جیهان واژۆ کرا و دەرفەتی ئەوەی بە حکومەتی ئەنکەرە دەدا کە کۆنتڕۆڵی کاروباری ترانزێت لەو ڕێڕەو ئاوییەدا بکات. ڕاگەێندراوەکە جەختی لەوە کردووەیەوە کە ئەو ڕێکەوتنە دەسکەوتێکی دیپلۆماسی مێژوویی بۆ تورکیا و یادگاری ئەتاتۆرکە و حکومەتی ئێستای ئەنکەرە لە کاردانەوەکانی ئەم بڕیارە ئاگادار نییە.
لە بەشێکی دیکەی ئەو ڕاگەێندراوەدا هاتووە کە سوپا هەر گۆڕانکارییەک لە دەستووردا ڕەتدەکاتەوە و ئەگەری باسکردن لە داڕشتنی دەستووری نوێ لە ئارادا نییە، بەڵکوو سوپا لەو بڕوایەدایە کە دەبێت دەستوور بە بێ هیچ گۆڕانکارییەک جێبەجێ بکرێت.
ئەو 103 ئەفسەرە فەتحوڵا گویلەنیان بە کەسێکی خیانەتکار بە تورکیا ناو بردووە.
ئەو 103 ئەفسەرە هەروەها ناو و واژۆی خۆیان لە سەر ڕاگەێندراوەکەدا بڵاو کردووەتەوە و بڵاوکردنەوەشی لە هەلومەرجێکدایە کە هێشتا دەستبەسەرکردنی ئەندامانی سوپا بە هۆی کودەتاکەی ساڵی 2016 بەردەوامە.
بڵاوکردنەوەی ئەو ڕاگەێندراوە کاردانەوەی بەرپرسانی حکومەتی تورکیای بە دواوە بووە. فەخرەدین ئاڵتون بەرپرسی پەیوەندییەکانی سەرۆکایەتی کۆماری تورکیا لە تویتێکدا بەرامبەر بەو کەسانە ڕایگەیاندووە کە دەبێت سنوری خۆیان بزانن و تورکیای ئێستا گۆڕاوە و خاوەن یاسایە.
سەرۆکی پەرلەمانی تورکیاش ڕاگەێندراوەکەی بە هەوڵێک بۆ کودەتا ناو بردووە.
عومەر چلیک وتەبێژی پارتی داد و گەشەپێدانیش ڕایگەیاندووە کە خەڵکی تورکیا کاتی خۆی وەڵامی ئەو کەسانە دەدەنەوە./.
