بە پێی ڕاپۆرتی جام کوردی، ئیگنازیا کاسیس وەزیری دەرەوەی سویسرا لە کۆنگرەیەکی ڕۆژنامەوانی هاوبەش لە گەڵ فۆئاد حوسێن وەزیری دەرەوەی عێراق وتی کە سویسرا پلانێکی ستراتیژیی بۆ دابینکردنی ئاشتی و سەقامگیری ڕۆژهەڵاتی ناوەڕاست و باکوری ئەفریقا ئامادە کردووە.
ناوبراو وتی کە ئەم پلانە سێ ساڵەیە و لە 2021 تا 2024 جێبەجێ دەکرێت و ئامانجەکەشی گەڕانەوەی ئاسایش و سەقامگیرییە بۆ ناوچەکە.
کاسیس وتی کە یەکێک لە ئامانجەکانی سەردانەکەم بۆ عێراق خستنەڕووی ئەم پلانە بووە.
ناوبراو وردەکاری پلانەکەی ئاشکرا نەکرد بەڵام پێگەی ڕاگەیاندنی حکومەتی سویسرا ڕاپۆرتێکی بڵاو کردووەتەوە کە تێیدا هاتووە ئەو وڵاتە پلانێکی درێژخایەنی بۆ ڕێگری لە شەڕ و ئاڵۆزییەکان، پێشکەشکردنی هاوکارییە مرۆڤییەکان و هەروەها هاوکاریکردنی وڵاتان بۆ گەشە و پێشکەوتن هەیە.
بەم پێیەش پلانەکەی سویسرا 5 خاڵی سەرەکی لە خۆ دەگرێت: ئاشتی، ئاسایش، مافی مرۆڤ و کاروباری کۆچ و کۆچبەران، گەشەی بەردەوام، ئابوری و زانست و تەکنۆلۆژیای نوێ.
کاسیس لە بەغدا ڕایگەیاند کە ئەمە یەکەم سەردانی وەزیری دەرەوەی سویسرایە بە درێژایی مێژوو بۆ عێراق و کۆتا سەردان نابێت.
ناوبراو وتی کە لەمڕۆوە عێراق پردی ئاشتی دەبێت و بە هاوکاری بەغدا بۆ مسۆگەربوونی ئەم ئامانجە هەوڵ دەدەین./.
