بە پێی ڕاپۆرتی جام کوردی، فەرمانگەی زانیاری وزەی ئەمریکا ڕایگەیاندووە کە هەناردەی نەوتی عێراق بۆ ئەو وڵاتە لە هەفتەی ڕابردوودا بەرزبوونەوەی هەبووە.
لە ڕاپۆرتێکی ئەو فەرمانگەیەدا هاتووە کە ڕێژەی هاوردەی نەوتی ئەمریکا لە 8 وڵاتی هەناردەکاری سەرەکی لە هەفتەی ڕابردوودا بەراورد بە هەفتەی پێشووی کە 5 ملیۆن و 635 هەزار بەرمیلی ڕۆژانە بووە، گەیشتووەتە 6 ملیۆن و 44 هەزار بەرمیل.
ئەو فەرمانگەیە ڕایگەیاندووە کە هەناردەی نەوتی عێراق بۆ ئەمریکا لە هەفتەی ڕابردوودا ڕۆژانە 220 هەزار بەرمیل بووە.
هەناردەی نەوتی عێراق بۆ ئەمریکا لە هەفتەی ڕابردوو، بەراورد بە هەفتەی پێشووی کە 217 هەزار بەرمیل بووە، ڕۆژانە 3 هەزار بەرمیل زیاتر بووە.
زۆرترین ڕێژەی هاوردەی نەوتی ئەمریکا لە هەفتەی ڕابردوو لە کەنەدا بە تێکڕای ڕۆژانە 4 ملیۆن و 418 هەزار بەرمیل، سعوودیە 394 هەزار بەرمیل، مەکزیک 388 هەزار بەرمیل، بەرازیل 331 هەزار بەرمیل، عێراق 220 هەزار بەرمیل و نایجڕیا 164 هەزار بەرمیل بووە.
ئەمریکا لە هەفتەی ڕابردوودا ڕۆژانە 79 هەزار بەرمیل نەوتی لە کۆڵۆمبیا هاوردە کردووە و ڕێژەی هاوردەی نەوتی ئەو وڵاتەش لە ئیکوادۆر ڕۆژانە 50 هەزار بەرمیل بووە./.
