بە پێی ڕاپۆرتی جام کوردی، ڕژێمی زایۆنیستی تاوانێکی دیکەی لە کارنامەی دڕندانەی خۆیدا تۆمار کرد و ئەویش هێرشی سەر کەمپی ئاوارەکان لە ناوچەی مەواسی لە خان یونس ی باشوری کەرتی غەززە بووە کە تێیدا 90 فەڵەستینی شەهید و 300 ی دیکەش بریندار بوون.
بەرپرسانی ڕژێمی زایۆنیستی پڕوپاگەندەی ئەوەیان کردووە کە ئامانج لە هێرشەکە، تیرۆری محەممەد زەیف فەرماندەی باڵی سەربازیی حەماس و ڕافع سەلامەی جێگری بووە بەڵام دواتر ڕایانگەیاند کە لە چارەنووسی ئەو دوو فەرماندەیە زانیارییەکیان نییە.
ڕۆژنامەی نیۆیۆرک تایمز لە پاش ئەم هەوڵە بێ ئەنجامەی زایۆنیستەکان بۆ تیرۆرکردنی محەممەد زەیف، ڕاپۆرتێکی بڵاو کردووەتەوە.
رۆژنامەکە محەممەد زەیفی وەک یەکێک لە داڕێژەران و جێبەجێکارانی ئۆپەراسیۆنی زریانی ئەقسای حەماس لە 7 ی تشرینی یەکەمی 2023 لە دژی ڕژێمی زایۆنیستی ناو بردووە و ڕایگەیاندووە کە ئەم کەسە بەردەوام لە هەوڵی تیرۆری ڕژێمی زایۆنیستی ڕزگاری بووە و چەندین دەیەیە کە لە لایەن ئەو ڕژێمەوە وەک کەسێکی داواکراو دەستنیشان کراوە.
هێمای بەرخۆدان
ئەو ڕۆژنامە ئەمریکییە لە درێژەدا ڕایگەیاندووە محەممەد زەیف بە هۆی سەرپەرشتیکردنی پەرەپێدانی توانا سەربازییەکانی حەماس لە لایەن بازنەکانی فەڵەستینەوە ڕێزی لێدەگیرێت و وەک هێمایەک بۆ بەرخۆدانی گرووپەکە دادەنرێت؛ کەسێک کە چەندین جار ڕێگایەکی بۆ مانەوەی دۆزیوەتەوە سەرەڕای ئەوەی وەک یەکێک لە ئامانجە سەرەکییەکانی یەکێک لە سوپا بەهێزەکانی ڕۆژهەڵاتی ناوەڕاست دەستنیشان کراوە.
ڕۆژنامەی نیویۆرک تایمز درێژەی بە ڕاپۆرتەکەی دا و ئاماژەی بە وتارە پێشوەختە تۆمارکراوەکەی محەممەد زەیف داوە کە لە ٧ی تشرینی یەکەم لە هەمان کاتدا لە گەڵ ئۆپەراسیۆنی زریانی ئەقسا نووسیبووی. لەو وتارەدا هاتبوو:” حەماس ئەم ئۆپەراسیۆنەی ئەنجامدا بۆ ئەوەی دوژمن بزانێت، ئەگەرنا، بە بێ تۆڵەسەندنەوە شتێکی ڕابردووە. ئەمڕۆ ڕۆژی جەنگاوەرە ڕاستگۆکانتانە بۆ ناشتنی ئەم دوژمنە تاوانبارە. کاتی ئەو هاتووە. لە هەر شوێنێک بیاندۆزیتەوە لە ناویان ببە. ئەم شەرمەزارییە لە خاک و پیرۆزییەکانتان لاببەن. شەڕ بکە و فریشتەکان لە تەنیشتتەوە شەڕ دەکەن”.
ڕۆژنامەی نیویۆرک تایمز لە درێژەی ڕاپۆرتەکەدا ڕایگەیاندووە: محەممەد زەیف ساڵانێکە لە بەردەم خەڵک دەرنەکەوتووە و کەم وێنەی گشتی بڵاوکراوەتەوە. لە مانگی یەکدا سوپای ئیسرائیل وێنەی پیاوێکی بڵاوکردەوە و ڕایگەیاندبوو کە محەممەد زەیفە؛ لەم وێنەیەدا دەبینرێت کە لە ژێر دارێکدا پشوو دەدات.
کەسایەتییەکی ئەفسانەیی
ئەو ڕۆژنامە ئەمریکییە بانگەشەی ئەوە دەکات: گومان دەکرێت ئێستا کەمئەندام بێت و لەوانەیە چاوێکی و بەشێک لە ئەندامەکانی لەدەست دابێت. ئیسرائیل لە ساڵی ٢٠١٤ ماڵەکەی بۆردومان کرد و هاوسەرەکەی و کوڕە ساواکەی کوشت.
ڕۆژنامەی نیویۆرک تایمز، بە کورتە باسێک لە ژیاننامەی ئەم فەرماندەیەی حەماس، نووسیویەتی: زەیف لە ساڵی ١٩٦٥ لە بنەماڵەیەکی هەژاری فەڵەستینی لەدایکبووە و لە کەمپی پەنابەرانی فەڵەستینی خان یونس لە گەڵ یەحیا سینوار، سەرۆکی حەماس ژیاوە. هەروەها لە غەززە لە گەڵ محەممەد دەحلان، یەکێک لە سەرکردە دوورخراوەکانی بزووتنەوەی فەتح گەورە بوو.
لە چاوپێکەوتنێکدا، ئیبراهیم ئەلمەدهون، شرۆڤەکاری نزیک لە حەماس، محەممەد زەیفی بە بەراوردکاری لە گەڵ شێخ ئەحمەد یاسین دامەزرێنەری بزووتنەوەی حەماس دادەنێت و نووسیویەتی: ئەو کەسایەتییەکی ئەفسانەییە لە گرووپی حەماس. دەشڵێت کەدەتوانن پەنجەمۆرەکانی بدۆزنەوە لەو شوێنانەی کە کەتیبەکانی قەسام گۆڕدراون و لە ژمارەیەکی سنوردار لە گرووپە چەکدارەکانەوە بەرزکراونەتەوە بۆ ئاستی سوپایەکی تەواو کە دەیان هەزار شەڕڤانی تێدابێت.
ڕۆژنامەی نیویۆرک تایمز درێژەی بەم ڕاپۆرتە داوە و ڕایگەیاندووە کە بە پێی لێدوانەکانی ئەلمەدهون، محەممەد زەیف فەرماندەی کەتیبەی سێبەر بووە کە لە ژێر دەسەڵاتی حەماسدا پاسەوانی دیلەکانی ئیسرائیل دەکات و وەبەرهێنانێکی بەرچاوی لە بەرهەمهێنانی چەک و دەستخستنی کەتیبەکانی ئەلقەسامدا کردووە لە تەکنەلۆژیا نوێیەکانی وەک فڕۆکەی بێفڕۆکەوانی سیخوڕی.
گرنگترین ستراتژیستی سەربازی بزووتنەوەی حەماس
هەروەها شرۆڤەکارانی زایۆنیست دان بەوەدا دەنێن کە محەممەد زەیف باڵی سەربازی حەماسی کردە هێزێکی شەڕکەری بەهێزتر و ڕێکخراوتر.
مایکل میلشتاین ئەفسەری پێشووی هەواڵگری ئیسرائیل و پسپۆڕی کاروباری فەڵەستین، محەممەد زەیف وەک یەکێک لە گرنگترین ستراتیژیستەکانی سەربازیی بزووتنەوەی حەماس باس دەکات.
ناوبراو سەبارەت بە زەیف دەڵێت: دڵی لێدانی لقی سەربازی حەماسە. زەیف فەرماندەی هێزێکە کە پێکهاتووە لە شەڕکەری نوخبە و کۆماندۆی دەریایی و توانای ئاسمانی.
ڕاشیگەیاندووە کە ئەو هێزێکی پەرەپێداوە کە ئێستا نزیکە لە ئاستی سوپای فەرمی وڵاتێکدا./.
