بە پێی ڕاپۆرتی جام کوردی، حەمید حوسێنی ڕایگەیاند کە پاش سەردانەکەی سەرۆکی هەرێمی کوردستان بۆ ئێران، بەشێک لە کێشەکان چارەسەر بووە و لە ئێستادا بیر لە پەرەپێدانی پەیوەندی نێوان بازرگاکانی هەر دوو لا دەکەینەوە.
ناوبراو ڕایگەیاند کە لە دوو مانگی سەرەتایی ئەمساڵی کۆچی هەتاوی، ئێران یەک ملیار و 600 ملیۆن دۆلار کاڵای بەدەر لە غاز و کارەبا هەناردەی عێراق کردووە کە پیشان دەدات هەناردەی ئێران بۆ عێراق بە شێوازی مانگانە 800 ملیۆن دۆلارە.
حوسێنی ڕایگەیاند کە لە ساڵی ڕابردوو پەیوەندییە بازرگانییەکانی نێوان ئێران و هەرێمی کوردستان باش نەبووە و لە 10 ملیار دۆلار هەناردە بۆ عێراق، تەنیا 2 ملیار و 500 ملیۆن دۆلاری بۆ هەرێمی کوردستان بووە.
ئەندامی دەستەی سەرۆکایەتی ژووری بازرگانی هاوبەشی ئێران – عێراق وتی کە عێراق ساڵانە 67 تا 75 ملیار دۆلار هاوردەی هەیە کە پشکی ئێران تەنیا 10 ملیار دۆلارە و ئەمەش بۆ ئێران ڕێژەیەکی زۆر کەمە.
ناوبراو وتی کە شوشە و ئاسن دوو کاڵایە کە زیاترین هەناردەیان لە ئێرانەوە بۆ عێراق هەبووە.
حوسێنی وتی کە بۆ بەرزکردنەوەی ڕێژەی هەناردەی ئێران بۆ عێراق لە ساڵی داهاتوو و گەیشتنی بە 12 ملیار دۆلار پلانی پێویست دادەڕێژین./.
