بە پێی ڕاپۆرتی جام کوردی، ناوەندی توێژینە و ڕاوێژکاریی ئابوری ” عراق المستقبل ” وێڕای ئەوەی لە سەر بەرزبوونەوەی ڕێژەی هاوردەی ئەم وڵاتە لە چین هۆشداریی داوە، ڕایگەیاندووە کە بەهای هەناردەی ڕاستەوخۆی کاڵای چینی بۆ عێراق لە ماوەی 10 ساڵ، واتە لە 2015 تا 2024، نزیکەی لە سەدا 93 زیادی کردووە.
لەو ڕاپۆرتەدا هاتووە کە بەهای گشتی هەناەردەی ڕاستەوخۆی چین بۆ عێراق لە ساڵی 2015 زیاتر لە 7 ملیار و 900 ملیۆن دۆلار بووە، لە کاتێکدا کە بە پێی ئامارەکانی مانگە سەرەتاییەکانی ئەمساڵ چاوەڕوان دەکرێت تا کانوونی یەکەمی 2024 بگاتە زیاتر لە 15 ملیار و 300 ملیۆن دۆلار.
لەو ڕاپۆرتەدا هاتووە کە ئامێر و کەرەستە میکانییەکانی وەک هەواگۆڕکێ و ئامێرەکانی دیکەی ساردکەرەوە لە سەدا 20 ی کۆی گشتی هەناردەی چین بۆ عێراق پێکدێنن و ئەمەش گەشەی لە سەدا 162 پیشان دەدات. لە ساڵی 2015 بەهای هەناردەی ئەو کەلوپەلانە بۆ عێراق یەک ملیار و 400 ملیۆن دۆلار بووە. هاوکات پێشبینی ئەوە دەکرێت کە ئەو ڕێژەیە تا کۆتایی ساڵی 2024 بگاتە 3 ملیار و 700 ملیۆن دۆلار.
هەروەها هەناردەکردنی ئامێرە کارەباییەکانی چین بۆ عێراق لە سەدا 14 ی کۆی گشتی هەناردەی ئەم وڵاتەی پێکهێناوە و گەشەی لە سەدا 77 پیشان دەدات. لە ساڵی 2015 بەهای هەناردەی ئەم جۆرە کاڵایانە لە چینەوە بۆ عێراق یەک ملیار دۆلار خەمڵێندراوە بەڵام پێشبینی دەکرێت تا کۆتایی ئەمساڵ بگاتە 9 ملیار و 100 ملیۆن دۆلار.
بەرزترین ڕێژەی گەشە پەیوەندی بە هەناردەی ئاسن و بۆڵای چین بۆ عێراق هەیە و ڕێژەکەشی لە سەدا 280 بووە، لە بەر ئەوەی کە بەهای هەناردەی ئاسنی چین بۆ عێراق لە ساڵی 2015 نزیکەی 131 ملیۆن دۆلار بووە بەڵام پێشبینی دەکرێت تا کۆتایی ئەمساڵ بگاتە 500 ملیۆن دۆلار.
بە پێی ئەم ڕاپۆرتە، هەناردەی کەرەستەی لاستیکی چین بۆ عێراق بە تایبەت تایەی ئۆتۆمبێل بە ڕێژەی لە سەدا 195 زیادی کردووە.
ئەم سەرچاوەیە باس لەوە دەکات، هۆکاری زیادبوونی هەناردەی چین بۆ عێراق، زیادبوونی خواست لە سەر کاڵا جۆراوجۆرەکانە لە ئەنجامی زیادبوونی گەشەی دانیشتووان و فراوانبوونی بیناسازی لە شارە جیاجیاکانی عێراق، دابینکردنی سەکۆیەک بۆ هەناردەکردنی ڕاستەوخۆی چین بۆ عێراق، گۆڕانی شێوازی بەکاربردن لای عێراقییەکان و هەناردەکردنی بەشێک لە کاڵا هاوردەکراوەکان بۆ وڵاتانی دیکە لە سەر بنەمای مامەڵەی ئاڵوگۆڕکردنە، بە تایبەتی لە گەڵ ئەو وڵاتانەی کە سنووردارکردنی بانکییان هەیە.
لە کۆتاییدا ئەم ڕاپۆرتە هۆشداری لە دەرئەنجامەکانی ناهاوسەنگی بازرگانی نێوان هەردوو وڵات داوە و جەختی لەسەر پێویستی کاراکردنی میکانیزمەکانی ئاڵوگۆڕی بازرگانی لەگەڵ چین و درووستکردنی سندوقێکی یەدەک کردووەتەوە کە بەشێک لە فرۆشتنی نەوتی عێراق بە چین تێیدا بمێنێتەوە./.
