بە پێی ڕاپۆرتی جام کوردی، بە بۆنەی جەژنی پیرۆزی مەبعەسی پێغەمبەری گەورەی ئیسلام. حەزرەتی محەممەدی مستەفا (د.خ)، چاوپێکەوتنی بەرپرسانی باڵای کۆماری ئیسلامی ئێران، باڵیۆز و دیپلۆماتکاران و نوێنەرانی وڵاتانی ئیسلامی لە گەڵ حەزرەتی ئایەتوڵڵا خامنەیی بەڕێوەچوو.
حەزرەتی ئایەتوڵڵا خامنەیی بەم بۆنەوە پیرۆزباییان لە گەلی ئێران و موسڵمانان بە گشتی کرد و بە گەورەترین و پیرۆزترین ڕووداوی مێژووی مرۆڤایەتی ناویان برد و وتیان: لە گەڵ هاتنی پێغەمبەری گەورە، وەشانێکی تەواو و کۆتایی و هەمیشەیی لە بەختەوەری هەر دوو جیهانی مرۆڤایەتی پێشکەش کرا.
بەڕێزیان بە ئاماژە بە برەودان بە زوڵم و ستەم و مافخۆری لە جیهانی ئەمڕۆ، ڕزگاربوون لەم دۆخە و باشترکردنی ژیانی خەڵکی جیهانیان بۆ جێبەجێکردنی بانگهێشتەکەی پێغەمبەری گەورەی ئیسلام و شوێنکەوتنی ئەو ڕێبازە مەزنە گەڕاندەوە و وتیان: بەرپرسیاریەتی ئێمە خۆباشترکردن و پیشاندانی ئیدارەی وڵاتە لە سەر ئەو مۆدێلە ئیسلامییە کە سەرکەوتنمان لەم بوارەدا هەبووە کە لە ئاستی جیهانیدا کاریگەریی هەبووە، هەرچەندە هەندیک کەموکوڕیشمان هەبووە.
ڕێبەری مەزنی شۆڕشی ئیسلامی ئێران لە بەشێکی دیکەی وتەکانیادا بە ئاماژە بە بەردەوامی کارەساتی غەززە، بە کارەساتی مرۆڤایەتی و تەنانەت مرۆڤایەتی ناویان برد و وتیان: ئەمڕۆ ئەمریکا، بەریتانیا و زۆربەی وڵاتانی ئەورووپی و شوێنکەوتووانی ئەوان لە پشتەوەی تاوانەکانی ڕژێمی خوێنمژی زایۆنیستین و لێرەشەوە دەتوانین بەوە بگەین کە سیستەمی ئێستای جیهان ناتەندرووست و نادادپەروەرە و نامێنێت.
حەزرەتی ئایەتوڵڵا خامنەیی بۆردومانکردنی نەخۆشخانە و کوشتاری نزیکەی 30 هەزار کەس لە خەڵکی غەززەیان بە شەرمەزارییەک بۆ کەلتور و شارستانیەتی ڕۆژئاوا ناو برد و وتیان: لە پشت ئەم تاوانانەوە پارەی ئەمریکا و چەک و هاوکاری سەربازی هەیە و وەک زایۆنیستەکان خۆیان دانیان بەمەدا ناوە، ناتوانن تەنیا یەک ڕۆژ بە بێ هاوکارییەکانی ئەمریکا بژین و لە توانایاندا نەبوو درێژە بەم شەڕە بدەن، هەر بۆیە ئەمریکییەکانیش لە ڕووداوە دڵتەزێنەکانی غەززەدا تاوانبار و بەرپرسیارن.
ڕێبەری مەزنی شۆڕشی ئیسلامی ئێران کشانەوەی زلهێزەکانی جیهان و لایەنگرانی ڕۆژئاوایان لەم پرسەدا بە چارەسەری قەیرانی غەززە ناو برد و وتیان: تێکۆشەرانی فەڵەستینی خۆیان توانای ئیدارەدانی مەیدانییان هەیە، بەو پێیەی کە تا بە ئەمڕۆ پیلان و هێرشەکانی ڕژێمی زایۆنیستی کاریگەرییەکی ئەوتۆی لە سەر هێزی ئەوان نەبووە.
بەڕێزیان جەختیان لە سەر ئەرکی سەر شانی وڵاتان بۆ پچڕانی هاوکارییە سیاسی و سەربازی و میدیاییەکان و نەناردنی کاڵا و پێداویستییەکان بۆ ڕژێمی زایۆنیستی کردەوە و وتیان: گەلانیش ئەرکی ئەوەیان لە سەر شانە لە پێناو جێبەجێکردنی ئەم ئەرکە گەورەیە، گوشار بخەنە سەر حکومەتەکانی خۆیان./.
