بە پێی ڕاپۆرتی جام کوردی، موحسین چەمەن ئارا لە کاردانەوەی بەرامبەر بە هەواڵی هەڵوەشانەوەی موڵەتی کارکردنی بانکی نیشتمانیی ئێران لە عێراق لە لایەن بانکی ناوەندی ئەو وڵاتەوە، وتی: ئەم هەواڵە دوورە لە ڕاستییەوە و هەواڵی وەهام نەبیستووە و لە ڕۆژانی ڕابردوودا هیچ کێشەیەک لە ڕەوتی ئاڵوگۆڕە بازرگانییەکانی نێوان ئێران و عێراقدا نەبووە.
ئەندامی دەستەی سەرۆکایەتی ژووری هاوبەشی بازرگانی ئێران – عێراق وتی: بەدەر لە درۆ و ڕاستیی ئەم هەواڵە، دەبێت ئاماژە بە خاڵێک بدرێت کە بانکی نیشتمانیی ئێران کاریگەرییەکی ئەوتۆی لە سەر چالاکی بازرگانان لە عێراق نەبووە کە ئێستا هەواڵی هەڵوەشانەوەی موڵەتی کارکردنی بتوانێت کێشەیەک بخوڵقێنێت.
ناوبراو پەیوەندییە بازرگانییەکانی ئیران و عێراقی بە ئاسایی ناو برد و وتی: ڕەوتی ئاڵوگۆڕە بازرگانییەکانی هەر دوو وڵات لە سەر هەمان دۆخی جارانە و کێشەیەکی نوێ ڕووی نەداوە، بە تایبەت هەڵوەشانەوەی موڵەتی کارکردنی بانکی نیشتمانیی ئێران./.
