بە پێی ڕاپۆرتی جام کوردی، محەممەد ڕزوانی فەڕ جێگری وەزیری ئابوری و سەرۆکی ڕێکخراوی گومرکی ئێران سەبارەت بە ڕێژەی بازرگانی دەرەکی لە 10 مانگی ڕابردووی ساڵی 1402 ی کۆچی هەتاوی وتی: لە 10 مانگی ڕابردووی ئەمساڵ 113 ملیۆن تەن کاڵا بە بڕی 40 ملیار و 470 ملیۆن دۆلار هەناردەی دەرەوە کراوە.
ناوبراو وتی: لە 10 مانگی ڕابردوودا 29 ملیار و 900 ملیار دۆلار نەوت، 700 ملیۆن دۆلار خزمەتگوزاری تەکنیکی و ئەندازیاری و 300 ملیۆن دۆلار کارەبا هەناردە کراوە کە بەمەش ڕێژەی هەناردەی وڵات بە گشتی لەم 10 مانگەدا گەیشتووەتە ڕێژەی 71 ملیار و 450 ملیۆن دۆلار.
سەرۆکی ڕێکخراوی گومرکی ئێران ڕایگەیاند کە ڕێژەی کاڵای هەناردەکراو بە بێ هەژمارکردنی نەوت، کارەبا و خزمەتگوزاری تەکنیکی و ئەندازیاری، لە ڕووی کێشەوە بەراورد بە ماوەی هاوشێوەی ساڵی ڕابردوو لە سەدا 9.39 بەرزبووەتەوە و لە ڕووی بەهاوە لە سەدا 11.44 دابەزیوە.
ڕزوانی فەڕ ڕایگەیاند کە لە 10 مانگی ڕابردوو نزیکەی 33 ملیۆن تەن کاڵا بە بەهای 54 ملیار و 400 ملیۆن دۆلار هاوردەی وڵات کراوە کە ئەمەش لە ڕووی کێشەوە لە سەدا 5.85 و لە ڕووی بەهاوە لە سەدا 11.59 بەرزبوونەوەی هەبووە.
جێگری وەزیری ئابوری ئێران وتی: لە ماوەی 10 مانگی ڕابردوودا 11 ملیار و 500 ملیۆن دۆلار کاڵا بۆ چین، 7 ملیار و 700 ملیۆن دۆلار بۆ عێراق، 5 ملیار و 200 ملیۆن دۆلار بۆ ئیمارات، 3 ملیار و 500 ملیۆن دۆلار بۆ تورکیا و یەک ملیار و 800 ملیۆن دۆلار کاڵا هەناردەی هیندستان کراوە. بەمەش لە سەدا 75 ی هەناردە لە ڕووی کێشەوە و لە سەدا 74 ی هەناردە لە ڕووی بەهاوە بۆ ئەم 5 وڵاتە بووە./.
