بە پێی ڕاپۆرتی جام کوردی، محەممەد سەجاد سەفار هەرەندی شارەزا لە کاروباری ئیسلامی سەبارەت بە گرنگی دیاریکردنی ” شەهیدی قودس ” وەک درووشمی سەرەکی چوارەمین ساڵیادی تیرۆری شەهید حاجی قاسم سولەیمانی، ڕایگەیاند کە ئۆپەراسیۆنی زریانی ئەقسا دیسانەوە پرسی فەڵەسینی کردووەتە بە پرسی یەکەم و سەرەکی لە جیهانی ئیسلام و تەنانەت جیهان و دەبێت لەم دەرفەتەش بۆ پیشاندانی ڕۆڵ و پشکی شەهید سولەیمانی لە پێناو بەرەوپێشبردنی ئامانجەکانی ئازادی قودس کەڵک وەربگرین.
بەڕێوەبەری توێژینگەی کەلتور و هونەری ئیسلامی ڕایگەیاند کە پێگەی فەڵەستین و قودس لە کۆمەڵگا ئیسلامییەکاندا بۆ هەمووان ڕوون و ئاشکرایە و شەهید سولەیمانی بەشێکی گەورە و کاریگەری ژیانی لە دامەزراوەیەکدا بووە کە ناوی قودسی لێنراوە و ئامانجی خۆیشی ئازادکردنی قودس و دابینکردنی ناوچەیەکی ئیسلامی بە بێ ڕژێمی زایۆنیستی بووە، هەر بۆیە دیاریکردنی شەهیدی قودس وەک درووشمی ساڵیادی تیرۆری شەهید سولەیمانی هەنگاوێکی گرنگ بووە.
سەفار هەرەندی وتی: بۆ یەکەم جار ئیسماعیل هەنیە بەرپرسی مەکتەبی سیاسی بزوتنەوەی حەماس دەستەواژەی شەهیدی قودسی بۆ شەهید سولەیمانی بەکار هێنا. ئەویش لە قۆناغێکدا کە پەیوەندییەکانی نێوان ئێران و حەماس بە هۆی هەندێک پرسی ناوچەییەوە لاواز بوو، ئەو هەڵوێستەی هەنیە و ئامادەبوونی لە تاران بە واتای تێپەڕاندنی قۆناغی ناکۆکییەکان بووە و بە واتایەکی دیکە یەکڕیزییەکی نوێی لە نێوان وڵاتان و لایەنە ئیسلامییەکان دابین کرد./.
