بە پێی ڕاپۆرتی جام کوردی بە گێڕانەوە لە گومرکی ئێران، لە 8 مانگی سەرەتایی ساڵی 1402 ی کۆچی هەتاوی، 90 ملیۆن و 44 هەزار تەن کاڵا بە بەهای 32 ملیار و 243 ملیۆن دۆلار هەناردەی دەرەوە کراوە. ئەو ڕێژەیە لە هەناردە بە بێ هەژمارکردنی هەناردەی کارەبا، نەوت و خزمەتگوزاری تەکنیکی و ئەندازیاری بووە، لە 8 مانگی ئەمساڵ بەراورد بە ماوەی هاوشێوەی ساڵی ڕابردوو لە ڕووی کێشەوە لە سەدا 27 بەرز بووەتەوە و لە ڕووی بەهاوە لە سەدا 1.6 دابەزیوە.
لەو ڕاپۆرتەدا هاتووە کە تێکڕای بەهای گومرۆکیی هەر تەن کاڵای هەناردەکراو لە 8 مانگی ساڵی ڕابردووی کۆچی هەتاوی 462 دۆلار بووە و لەم ماوەیەدا بە لە سەدا 22.5 دابەزین گەیشتووەتە 358 دۆلار.
گومرکی ئێران ڕایگەیاندووە کە زیاترین کاڵای هەناردەکراوی ئێران لە 8 مانگی ڕابردووی ساڵی 1402 ی کۆچی هەتاوی بۆ وڵاتانی چین بە 9 ملیار و 158 ملیۆن دۆلار، عێراق بە 6 ملیار و 23 ملیۆن دۆلار، ئیماراتی یەکگرتووی عەرەبی بە 4 ملیار و 162 ملیۆن دۆلار، تورکیا بە 3 ملیار و 28 ملیۆن دۆلار و هیندستان بە یەک ملیار و 466 ملیۆن دۆلار بووە.
لە درێژەی ئەو ڕاپۆرتەدا هاتووە کە لە 8 مانگی ڕابردووی ساڵی 1402 ی کۆچی هەتاوی، 67 ملیۆن و 596 هەزار تەن کاڵا بە بەهای 23 ملیار و 837 ملیۆن دۆلار هەناردەی ئەو 5 وڵاتە کراوە کە لە ڕووی کێشەوە لە سەدا 70 و لە ڕووی بەهاوە لە سەدا 73 ی کۆی گشتی هەناردەی ئێرانی لە خۆ گرتووە.
ڕاپۆرتەکە لە سەر ڕێژەی هاوردەی ئێران لە ماوەی 8 مانگی سەرەتایی ئەمساڵی کۆچی هەتاویدا ڕایگەیاندووە کە لەم ماوەیەدا 24 ملیۆن و 709 هەزار تەن کاڵا بە بەهای 42 ملیار و 199 ملیۆن دۆلار هاوردە کراوە کە لە ڕووی کێشەوە لە سەدا 4.32 لە ڕووی کێشەوە و لە سەدا 12.36 لە ڕووی بەهاوە بەرزبوونەوەی هەبووە.
گومرکی ئێران ڕایگەیاندووە کە ئیماراتی یەکگرتووی عەرەبی بە 13 ملیار و 54 ملیۆن دۆلار، چین بە 12 ملیار و 191 ملیۆن دۆلار، تورکیا بە 4 ملیار و 443 ملیۆن دۆلار، ئەڵمانیا بە یەک ملیار و 428 ملیۆن دۆلار و هیندستان بە یەک ملیار و 244 ملیۆن دۆلار ئەو 5 وڵاتەن کە زیاترین هەناردەیان بۆ ئێران هەبووە.
لە کۆتایی ڕاپۆرتەکەدا هاتووە کە لە سەدا 64 ی هاوردەی ئێران لە ڕووی کێشەوە و لە سەدا 75 ی لە ڕووی بەهاوە لە ماوەی 8 مانگی ڕابردووی ساڵی 1402 ی کۆچی هەتاوی لەو 5 وڵاتەوە بووە./.
