بە پێی ڕاپۆرتی جام کوردی، حوجەتوڵڵا عەبدولمەلکی ڕایگەیاند کە ناوچەی ئازادی بازرگانیی بانە و مەریوان دەرفەتێکە بۆ چالاکی هاوبەشی ئابوری نێوان ئێران و عێراق و بازرگانان و چالاکوانانی ئابوریی هەرێمی کوردستان.
ناوبراو بە ئاماژە بە پەرەپێدانی ئاڵوگۆڕە بازرگانییەکان لە گەڵ هەرێمی کوردستان وتی: کردنەوەی یەکەی وەبەرهێنەری کاڵا لە لایەن بازرگانان و چالاکوانانی ئابوری هەرێمی کوردستان بە تایبەت سلێمانی لە ناوچەی ئازادی بانە و مەریوان دەتوانێت ئەم هەرێمە بکاتە جەمسەرێکی هەناردە و بازرگانییەکی بەسوودی بۆ چالاکوانانی ئابوری بە دواوە بێت.
سکرتێری ئەنجومەنی باڵای ناوچە ئازادە بازرگانییەکانی ئێران ڕایگەیاند کە پەیوەندییە ئابوری و بازرگانییەکانی نێوان کۆماری ئیسلامی ئێران و هەرێمی کوردستان ڕۆژ لە دوای ڕۆژ لە گەشەسەندندایە و وتی: سەرەڕای ئەو هەموو کێشەیە کە لە لایەن ئەمریکاوە بووەتە بەربەستی بەردەم پەیوەندییەکان، بەڵام ئەم پەیوەندییانە لە بواری ئابوری و سیاسی لە نێوان ئێران و عێراق و هەرێم زیاتر بەرەوپێشچوونی هەبووە و بە هەوڵی بەرپرسانی هەر دوو لا و کەرتی تایبەتی ئێران و هەرێمی کوردستان، ڕێژەی سەرمایەگوزاری هاوبەشیش بەرز بووەتەوە.
عەبدولمەلکی وتی: ئاسایش، کەلتور و بەرژەوەندییە ئابورییەکانی ئێران و هەرێمی کوردستان پێکەوە بەستراوە و هەر هۆکارێک کە لە دەرەوە ببێتە کێشە و ناسەقامگیری، کاریگەریی لە سەر هەر دوو لا دەبێت، هەر بۆیە پێویستە لە بواری سیاسی و ئەمنی هاوکاری باشتر لە نێوانیاندا هەبێت تا بوونی ئاسایش ببێتە هۆکاری پەرەسەندنی زیاتری بازرگانییەکان.
سکرتێری ئەنجومەنی باڵای ناوچە ئازادە بازرگانییەکانی ئێران وتی: لە دەروازەی سنوریی باشماخ لە گەڵ پارێزگاری کوردستان ی ئێران قسەم کردووە و بە پێی کەمبوونەوەی هاتووچۆی ترانزێتی لەم سنورە، بڕیار دراوە کە زۆربەی ڕێژەی ترانزێتی کاڵا لە پەروێزخان و حاجی ئۆمەران ببرێتە باشماخ کە ببێتە هۆکاری گەشەی پەیوەندییەکان لە گەڵ هەرێمی کوردستان و پارێزگای سلێمانی./.
