بە پێی ڕاپۆرتی جام کوردی، بەشار ئەسەد سەرۆک کۆماری سوریا شەوی پێنج شەممە پێشوازیی لە سەید عەمار حەکیم سەرۆکی ڕەوتی حیکمەی نیشتمانی عێراق کرد و هەر دوو لا بابەتە گرنگەکانی تایبەت بە پەیوەندییەکانی دیمەشق و بەغدا و دۆخی ناوچەکەیان تاوتوێ کرد.
بەشار ئەسەد سەرۆک کۆماری سوریا لەو چاوپێکەوتنەدا وتی: سەقامگیری سیاسی و ئەمنی عێراق کاریگەری ئەرێنی لە سەر ناوچەکە و ڕۆڵی داهاتووی عێراق دەبێت، بە هۆی پێگەی مێژوویی و جوگرافی عێراق لە ناوچەکە، ڕۆڵی سیاسی و ئابوریی بەرچاو دەبێت.
ئەسەد وتی کە سوریا عێراق لە خۆی دەزانێت نەک تەنیا وڵاتێکی برادەر.
سەید عەمار حەکیمیش ڕایگەیاند کە وتووێژ لە گەڵ بەرپرسانی باڵای سوریا لە بەرژەوەندی هەر دوو وڵاتە و بە پێویستییەک بۆ وڵاتانی ناوچەکە دادەنرێت.
ناوبراو وتی کە دەربازبوونی سوریا لە قەیران، کاریگەری ئەرێنیی لە سەر دراوسێکان دەبێت لە بەر ئەوەی کە سەقامگیری سوریا، سەقامگیری ناوچەکەیە بە گشتی و ئەو کرانەوەش کە سەبارەت بە سوریا بینراوە، بە هۆی پێگەی ناوچەیی ئەم وڵاتەیە.
سەرۆکی ڕەوتی حیکمەی نیشتمانی عێراق جەختی لە سەر پێویستی بەرزکردنەوەی ئاستی هاوکارییەکانی بەغدا و دیمەشق لە سەرجەم بوارەکان بە تایبەت سیاسی و ئابوری کردەوە./.
