بە پێی ڕاپۆرتی جام کوردی، سەرچاوەیەک لە حکومەتی عێراق کە ناوەکەی ئاشکرا نەکراوە، ڕایگەیاندووە کە سەردانەکەی عەلی شەمخانی ڕاوێژکاری ئاسایشی نیشتمانی ئێران بۆ بەغدا بە مەبەستی واژۆکردنی ڕێکەوتنی پاراستنی ئاسایشی سنورە هاوبەشەکانی هەر دوو وڵاتە.
سەرچاوەکە ڕایگەیاندووە کە شەمخانی لە بەغدا لە گەڵ مەسرور بارزانی سەرۆک وەزیرانی هەرێمی کوردستان و قاسم ئەعرەجی ڕاوێژکاری ئاسایشی نیشتمانی عێراق سەبارەت بە ئاسایشی سنورەکان کۆدەبێتەوە و دوا جار ڕێکەوتنێک لەم بوارەدا واژۆ دەکەن.
سەردانەکەی شەمخانی بۆ عێراق لە پاش ئەوە دێت کە ناوبراو لە ماوەی ڕابردوو سەردانی چین و ئیماراتی کرد و هەروەها ڕێکەوتنی ئاساییکردنەوەی پەیوەندییەکانیشی لە گەڵ سعوودیە واژۆ کردووە.
عەلی شەمخانی ڕاوێژکاری ئاسایشی نیشتمانی ئێران بڕیارە لە بەغدا لە گەڵ سەرۆک کۆمار، سەرۆک وەزیران و سەرۆکی پەرلەمانی عێراق کۆببێتەوە./.
