بە پێی ڕاپۆرتی جام کوردی، محەممەد ڕزوانی فەڕ سەرۆکی دەستەی گومرکی ئێران نوێترین ڕاپۆرتی لە سەر دۆخی بازرگانی دەرەکی ئەم وڵاتە خستەڕوو و ڕایگەیاند: داهاتی وڵات لە ڕێگای هەناردەی نانەوتییەوە لە 11 مانگەی ساڵی 1401 ی کۆچی هەتاوی گەیشتووەتە 48 ملیار و 800 ملیۆن دۆلار کە بەراورد بە ماوەی هاوشێوەی ساڵی پێشووی لە سەدا 12.22 گەشەی هەبووە.
ناوبراو وتی: لە 11 مانگی ڕابردووی ساڵی 1401 ی کۆچی هەتاوی، زیاتر لە 111 ملیۆن و 300 هەزار تەن بە بەهای 48 ملیار و 800 ملیۆن دۆلار هەناردەی نانەوتی هەبووە کە ئەمەش بەراورد بە ماوەی هاوشێوەی ساڵی 1400 ی کۆچی هەتاوی، لە سەدا 1.16 دابەزین لە ڕووی کێش و لە سەدا 12.22 بەرزبوونەوەی لە ڕووی بەهاوە هەبووە.
جێگری وەزیری ئابوری و دارایی ئێران ئاماژەشی بە ڕێژەی هاوردە لەم ماوەیەدا و وتی: هاوردەی وڵات لە ماوەی 11 مانگەی ساڵی 1401 ی کۆچی هەتاوی بە ڕێژەی 33 ملیۆن و 600 هەزار تەن بە بەهای 53 ملیار و 700 ملیۆن دۆلار بووە کە لە ڕووی کێشەوە بە ڕێژەی لە سەدا 8.61 دابەزین و لە ڕووی بەهاوە لە سەدا 15.28 بەرزبوونەوەی بەراورد بە ماوەی هاوشێوەی ساڵی ڕابردوو هەبووە.
ڕزوانی فەڕ ڕایگەیاند کە تێکڕای بەهای گومرکیی هەر تەن کاڵای هەناردەکراوە لە 386 دۆلارەوە لە 11 مانگی ساڵی ڕابردوو گەیشتووەتە 439 دۆلار لە 11 مانگەی ئەمساڵ و وتی کە ئەم ئامارە پیشاندەری گەشەی لە سەدا 13.54 و لە کاتێکدایە کە تێکڕای بەهای گومرکیی هەر تەن کاڵای هاوردەکراو 1597 دۆلار بووە کە بەراورد بە ڕێژەی 1266 دۆلاریی 11 مانگی ساڵی ڕابردوو، لە سەدا 26.14 گەشەی هەبووە.
زۆرترین کاڵای هەناردەکراو
ڕزوانی فەڕ سەبارەت بە دۆخی هەناردەی کاڵای پترۆکیمیا وتی: لەم ماوەیەدا 21 ملیار و 700 ملیۆن دۆلار کاڵا و بەرهەمی پترۆکیمیا هەناردە کراوە کە لە ڕووی کێشەوە لە سەدا 40.25 و لە ڕووی بەهاوە لە سەدا 44.49 ی کۆی گشتی هەناردەی نانەوتیی لە خۆ گرتووە. هەروەها زۆرترین کاڵای هەناردەکراو غازی سرووشتی شل بە بەهای 6 ملیار و 800 ملیۆن دۆلار بووە کە پشکی لە سەدا 13.97 ی کۆی گشتی هەناردەی هەبووە.
ئەو وڵاتانەی کڕیاری کاڵای ئێرانین
جێگری وەزیری دارایی و سەرۆکی دەستەی گومرکی ئێران لە درێژەدا ئاماژەی بە وردەکاری گەورەترین ئامانجی هەناردەی وڵات لەم ماوەیەدا و وتی: چین بە 13 ملیار و 600 ملیۆن دۆلار، عێراق بە 9 ملیار و 400 ملیۆن دۆلار، تورکیا بە 6 ملیار و 900 ملیۆن دۆلار، ئیماراتی یەکگرتووی عەرەبی بە 5 ملیار و 300 ملیۆن دۆلار و هیندستان بە یەک ملیار و 900 ملیۆن دۆلار، ئەو وڵاتانەن کە زۆرترین کاڵا و بەرهەمی ئێرانییان هاوردە کردووە.
بە وتەی ناوبراو، ئەم 5 وڵاتە بە گشتی پشکی لە سەدا 73.45 ی کێش و لە سەدا 75.79 ی بەهای کۆی گشتی هەناردەی نانەوتی ئێرانیان هەبووە.
ئێران زۆرترین هاوردەی لە کام وڵاتانەوە کردووە؟
ڕزوانی فەڕ سەبارەت بە گەورەترین وڵاتانی پەیوەندیدار بە هاوردەی ئێرانەوە وتی: ئیمارات بە 16 ملیار و 500 ملیۆن دۆلار، چین بە 14 ملیار و 200 ملیۆن دۆلار، تورکیا بە 5 ملیار و 600 ملیۆن دۆلار، هیندستان بە 2 ملیار و 600 ملیۆن دۆلار و ئەڵمانیا بە یەک ملیار و 800 ملیۆن دۆلار ئەو وڵاتانەن کە ئێران زیاترین هاوردەی لەوان هەبووە.
بە وتەی ناوبراو، بە گشتی لە ڕووی کێشەوە لە سەدا 65.18 و لە ڕووی بەهاوە لە سەدا 75.77 ی کۆی گشتی هاوردەی ئێران لە ڕێگای ئەم 5 وڵاتەوە بووە.
سەرۆکی دەستەی گشتی گومرکی ئێران سەبارەت بە دوایین دۆخی ترانزێتی ئێرانیش وتی کە ترانزێتی دەرەکی وڵات لە 11 مانگەی ساڵی 1401 ی کۆچی هەتاوی بەراورد بە ماوەی هاوشێوەی ساڵی ڕابردوو لە سەدا 5.22 گەشەی هەبووە و گەیشتووەتە 12 ملیۆن تەن./.
