بە پێی ڕاپۆرتی جام کوردی، فەریق محەممەد باقری سەرۆک ئەرکانی هێزە چەکدارەکانی ئێران لە چاوپێکەوتنی وەزیری بەرگری عێراق لە تاران وتی: دوو وڵاتی ئێران و عێراق هاوبەشییەکی زۆریان لە بواری کەلتوری، ئائینی، سیاسی و مێژوویی هەیە، ئەڵبەت ئێمە لە پرسی بەرەنگاربوونەوەی تیرۆریزمدا چالاکی هاوبەشمان هەیە کە شەهید سولێمانی و شەهیدانی دیکە بەڵگەیە لە سەر ئەو بەرەنگاربوونەوە هاوبەشەمان لە بەرامبەر تیرۆریستان.
ناوبراو وتی: وڵاتانی زلهێز بڕیاری ئەوەیان هەبوو بە پێکهێنان و پاڵپشتی لە داعش بە سەر وڵاتانی ناوچەکەدا زاڵ بن بەڵام هاوکاری نێوان گەلانی هەر دوو وڵاتی ئێران و عێراق و هێزە چەکدارەکانیان ئەو پیلانەی دوژمنانی شکست پێهێنا.
فەریق باقری وتی: ئێران بۆ دابینکردنی ئاسایشی عێراق شەهیدێکی زۆری پێشکەش کردووە کە لەم پێناوەدا شەهید سولێمانی لە گەڵ شەهید موهەندیس بوونە هێمای برایەتی و یەکڕیزی نێوان هەر دوو وڵات.
سەرۆک ئەرکانی هێزە چەکدارەکانی ئێران وتی: دۆخی ناوچەکە وا دەخوازێت کە ئێران و عێراق بە هاوکاری یەکتر ئاسایشی ناوچەکە دابین بکەن لە بەر ئەوەی کە هەر دوو وڵات ڕوبەڕوی هەڕەشەی هاوبەش بوونەتەوە.
ناوبراو وتی: پەیوەندییە سەربازییەکانی نێوان ئێران و عێراق بە پێی چاوەڕوانییەکان نییە و هیوادارین سەردانی وەزیری بەرگری عێراق ببێتە خاڵێکی وەرچەرخان لە بەرەوپێشچوونی هاوکارییە سەربازییەکانی نێوان هەر دوو وڵات./.
