بە پێی ڕاپۆرتی جام کوردی، وەزارەتی بازرگانی و پیشەسازی هیندستان کۆی گشتی ئاڵوگۆڕە بازرگانییەکانی لە گەڵ ئێران لە ساڵی 2022 بە 2 ملیار و 500 ملیۆن دۆلار ڕاگەیاند.
ئاڵوگۆڕە بازرگانییەکانی ئێران و هیندستان لە ساڵی 2022 بەراورد بە ساڵی پێشووی لە سەدا 48 گەشەی کرد. کۆی گشتی ئاڵوگۆڕە بازرگانییەکانی ساڵی 2021 ی هەر دوو وڵات زیاتر لە یەک ملیار و 693 ملیۆن دۆلار ڕاگەێندرابوو.
هەناردەی هیندستان بۆ ئێران لە مانگی کانوونی دووەم تا کانوونی یەکەمی 2022 لە سەدا 44 گەشەی کرد و گەیشتە یەک ملیار و 847 ملیۆن دۆلار. هیندستان لە ساڵی 2021 بە ڕێژەی یەک ملیار و 284 ملیۆن دۆلار کاڵای هەناردەی ئێران کردبوو.
هاوردەی هیندستانیش لە ئێران لە ساڵی 2022 لە سەدا 60 گەشەی کرد و گەیشتە 653 ملیۆن دۆلار. هیندستان لە ساڵی 2021 بە ڕێژەی 409 ملیۆن دۆلار کاڵای لە ئێران هاوردە کردبوو.
برنج گرنگترین کاڵای هەناردەکراوی هیندستان بۆ ئێران لە ساڵی 2022 بووە بە شێوازێک کە لە سەدا 59 ی کۆی گشتی هەناردەی هیندستان بۆ ئێران لە ساڵی ڕابردوو برنج بووە.
هەناردەی برنجی هیندستان بۆ ئێران لە ساڵی 2022 بەراورد بە ساڵی پێشووی لە سەدا 52 گەشەی کرد و لە 719 ملیۆن دۆلار گەیشتە یەک ملیار و 98 ملیۆن دۆلار. چا بە 86 ملیۆن دۆلار و شەکر بە 79 ملیۆن دۆلار لە پلەکانی دووەم و سێهەمی کاڵای هەناردەکراوی هیندستان بۆ ئێران بووە.
هەروەها بەرهەمە نەوتییەکان گرنگترین کاڵای هاوردەکراوی هیندستان لە ئێران لە ساڵی 2022 بووە و 175 ملیۆن دۆلار بەرهەمی نەوتی لە ساڵی 2022 لە ئێرانەوە هاوردە کراوە. هاوردەی بەرهەمە نەوتییەکانی ئێران لە لایەن هیندستانەوە لە ساڵی 2022 بەراورد بە ساڵی پێشووی 4 هێندە زیادی کردووە. هیندستان لە ساڵی 2021 بە ڕێژەی 43 ملیۆن دۆلار بەرهەمە نەوتییەکانی ئێرانی هاوردە کردبوو.
مادەی خاوی وەبەرهێنانی ڕەنگ بە 152 ملیۆن دۆلار و میوە بە 148 ملیۆن دۆلار لە پلەکانی دووەم و سێهەمی کاڵای هاوردەکراوی هیندستان لە ئێران لە ساڵی 2022 بووە./.
