بە پێی ڕاپۆرتی جام کوردی، کۆنفرانسی ڕۆژنامەوانی هاوبەشی وەزیرانی دەرەوەی عێراق و ڕووسیا لە شاری بەغدا بەڕێوەچوو.
فۆئاد حوسێن وەزیری دەرەوەی عێراق لەو کۆنفرانسە ڕۆژنامەوانییەدا وتی کە ئێمە داوای ئاگربەست لە ئۆکراینا دەکەین و دەمانەوێت کە ئەم قەیرانە لە ڕێگای وتووێژەوە کۆتایی بێت.
وەزیری دەرەوەی عێراق وتی کە ئێمە پەیوەندی مێژووییمان لە گەڵ ڕووسیا هەیە و هاوکارییەکانی نێوانمان لە بواری ئاسایش و ئابوریدا لە ئاستێکی باڵادایە.
فۆئاد حوسێن ڕایگەیاند کە لە سەردانەکەی واشنتن باس لە هاوکاریکردنی کۆمپانیا ڕووسەکان دەکرێت.
لە بەرامبەردا سرگێی لاوڕۆڤ ڕایگەیاند کە لە سەردانەکەیدا بۆ بەغدا پرسی پەیوەندییە دووقۆڵییەکان و دەرفەتەکانی هاوکاری ئابوری و بازرگانی نێوان ڕووسیا و عێراق تاوتوێ کراوە.
وەزیری دەرەوەی ڕووسیا وتی کە لێژنەی هاوبەشی ڕووسیا و عێراق لە بەغدا کۆدەبێتەوە و کورسی خوێندنمان بۆ خوێندکارانی عێراقی زیاد کردووە، هەروەها هاوپەیمانی چوارقۆڵی ئێران، سوریا، ڕووسیا و عێراق کاریگەری خۆیی لە شکست و لەناوبردنی تیرۆریزم سەلماندووە.
ناوبراو وتی کە مۆسکۆ لە پرسە ناوچەییەکاندا بە تایبەت لە پرسی فەڵەستین درێژە بە ڕاوێژی خۆی لە گەڵ عێراق دەدات.
لاوڕۆڤ وتی کە پەیوەندییە دووقۆڵییەکانی مۆسکۆ و بەغدا دەبێت کاریگەری لە گەمارۆکانی ڕۆژئاوا وەرنەگرێت.
وتیشی کە ئەمریکا لە ناوچە کوردنشینەکان یاری بە ئاگرەوە دەکات و هاندەری هەوڵی جیابوونەوەی ئەوانە.
وەزیری دەرەوەی ڕووسیا وتی: ئەوەمان بە باشی لەبیرە کە چۆن موسڵ، ڕققە و شارەکانی دیکە خاپوور کران و تاوانەکانی دیکەشمان لەبیرە کە بەداخەوە ڕای گشتی جیهانی بۆ سزادانی تاوانبارانی ئەو ڕووداوانە بەخۆوە سەرقاڵ نەکردووە و تەنانەت ئەوانیشی نیگەران نەکردووە.
سرگێی لاوڕۆڤ وتی کە فەڵەستین پرسێکی گرنگ و سەرەکییە و وڵاتانی ڕۆژئاوا بۆ چارسەرکردنی ئەم کێشەیە تەنیا کات بە فیڕۆ دەدەن./.
