بە پێی ڕاپۆرتی جام کوردی، پەیام و تویتی سەرکردەکانی لایەنە سیاسییەکانی عێراق باس لە هیواداری ئەوان سەبارەت بە پێکهێنانی حکومەتی نوێی عێراق لە ڕێگای ئەو هاوپەیمانییەوە دەکات کە بە ناوی هاوپەیمانی بەڕێوەبردنی دەوڵەتەوە بڕیارە گرێ کوێرەی قەیرانی یەک ساڵەی سیاسی لەم وڵاتە بکاتەوە.
هاوپەیمانی بەڕێوەبردنی دەوڵەت لە لایەنەکانی چوارچێوەی هاوئاهەنگی، هاوپەیمانییەکانی عەزم و سەروەری سوننە، پارتی دیمۆکراتی کوردستان، یەکێتی نیشتمانی کوردستان و فراکسیۆنی بابلیۆنی مەسیحی پێکهاتووە و هێشتا دیار نییە کە ڕەوتی سەدر لەم هاوپەیمانییەدا بەشدار دەبێت یان نە. پرسیار ئەوەیە کە ئایا ئەم بێدەنگییەی سەدر بە واتای بەشدارینەکردنی ڕەوتەکەیە لە کابینەی نوێی عێراق و ئەم بژاردە نوێیە بڕیارە بە بێ سەدرییەکان بخرێتە بواری جێبەجێکردنەوە؟
زۆربەی سەرکردەی لایەنە سیاسییەکانی عێراق بەردەوام جەختیان لەوە کردووەتەوە کە هیچ حکومەتێکی نوێ، بە بێ بەشداری سەدرییەکان بەردەوام نابێت. بە واتایەکی دیکە، ئەگەر موقتەدا سەدر نەرمی نەنوێنێت، تەنانەت لە ئەگەری پێکهێنانی حکومەتی کاتیی کاربەڕێکەر، سەقامگیری سیاسی و کۆمەڵایەتی عێراق دەستەبەر ناکرێت. خاڵێکی گرنگ ئەوەیە کە ئایا هاوپەیمانەکانی سەدر، پارتی دیمۆکراتی کوردستان و سوننەکان، تا چەندە دەتوانن بەرگەی ئەم دۆخەی عێراق بە هۆی دژایەتیکردنی پرۆسەی پێکهێنانی حکومەت لە لایەن سەدرەوە بگرن؟ پێدەچێت پرسیاری سەرەکی هاوپەیمانەکانی سەدریش ئەوەیە کە تا کەی بڕیارە ئەم قەیرانە سیاسییە بەردەوام بێت؟
میدیاکانی نزیک لە پارتی دیمۆکراتی کوردستان وەک شەفەق نیوز ئەم خواستەی هاوپەیمانەکانی سەدری بۆ کۆتایی هێنان بەم دۆخە چەقبەستووە سیاسییەی عێراق نەشاردووەتەوە.
شەفەق نیوز ڕایگەیاندووە کە خەمیس خەنجەر سەرۆکی هاوپەیمانی سیادەی سوننە، ڕۆژی یەک شەممە لە پەیوەندییەکی تەلەفوونی لە گەڵ موقتەدا سەدر سەبارەت بە بەشداریی ئەم هاوپەیمانییە لە هاوپەیمانیی بەڕێوەبردنی دەوڵەت وتووێژی کردووە و بۆچوونی سەدری لە سەر ئەم پرسە وەرگرتووە.
لەو ڕاپۆرتەدا هاتووە کە خەنجەر دڵنیایی بە سەدر داوە کە بەشداریی سیادەی سوننە لە هاوپەیمانی بەڕێوەبردنی دەوڵەت بە واتای دژایەتیکردنی سەدر و بۆچوونەکانی نییە.
هەروەها میدیاکانی عێراق ڕایانگەیاندووە کە خەنجەر لە ئەگەری بەشداریی کۆتایی لەم هاوپەیمانییەدا، بەدواداچوونی تەواو بۆ داواکارییەکانی سەدر وەک هەڵوەشانەوەی پەرلەمان و دووبارەکردنەوەی هەڵبژاردنی پێشوەختە دەکات.
هاوپەیوەند لە گەڵ ئەمەش، مەشعان جبوری سیاسەتمەداری عێراقی لە هەژماری تایبەتی خۆی لە تۆڕی کۆمەڵایەتی تویتەر ڕایگەیاندووە کە ڕێکەوتنی لایەنەکانی بەشدار لە هاوپەیمانی بەڕێوەبردنی دەوڵەت چەندین بابەتی وەک پابەندبوون بە پەسەندکردنی یاسای لێبوردن، نەوت، کشانەوەی هێزەکان لە ناوچە ئازادکراوەکانی ژێر دەستی داعش و جێگیرکردنی هێزەکانی دیکە لە شوێنی ئەوان، چارەسەرکردنی دۆسیەی بێسەروشوێنبووەکان و بەڕێوەچوونی هەڵبژاردنی پێشوەختە لە ماوەی یەک ساڵ و نیوی داهاتوو لە خۆ دەگرێت.
هەواڵی پێکهێنانی هاوپەیمانی بەڕێوەبردنی دەوڵەت لە کاتێکدا بڵاو بووەتەوە کە محەممەد شیاع سودانی کاندیدی چوارچێوەی هاوئاهەنگی بۆ پۆستی سەرۆک وەزیرانی عێراق، شەوی یەک شەممەی ڕابردوو گرنگترین بەرنامەکانی حکومەتی داهاتووی خستەڕوو./.
