بە پێی ڕاپۆرتی جام کوردی، ناسر کەنعانی وتەبێژی وەزارەتی دەرەوەی کۆماری ئیسلامی ئێران لە کۆنگرەی ڕۆژنامەوانی هەفتانەی خۆی سەبارەت بە ڕووداوەکانی عێراق، وتی: عێراق وڵاتی گەورە و گرنگ و دراوسێی ئێمەیە، ئاساییە کە بە وردی و هەستیارییەوە بەدواداچوون بۆ ڕووداوەکان و گۆڕانکارییەکانی ئەم وڵاتە بکەین.
ناوبراو وتی: کۆماری ئیسلامی ئێران بەردەوام جەختی لە سەر سەقامگیری و ئاسایشی ئەم وڵاتە دراوسێ و دۆست و برادەرە کردووەتەوە و پێی وایە کە ئاسایش و سەقامگیری عێراق، ئاسایش و سەقامگیری ئێران و ناوچەکەیە.
کەنعانی وتی: گۆڕانکارییەکانی عێراق ناوخۆییە و لە چوارچێوەی دەستووری ئەم وڵاتە و میکانیزمە یاساییەکان و بە شێوازی ئاشتیانە و ڕێزی بەرانبەر دەکرێت لایەنە سیاسییەکان چارەسەری بکەن و بە پێکهێنانی حکومەتێک یارمەتیدەری گەشە و پێشکەوتنی عێراق بن.
وتەبێژی وەزارەتی دەرەوەی کۆماری ئیسلامی ئێران وتی: ئێران بەردەوام ڕێزی لە هەڵبژاردنی گەلی عێراق گرتووە و جەختی لەوەش کردووەتەوە کە وتووێژ باشترین شێوازی چارەسەرکردنی کێشە ناوخۆییەکانی ئەم وڵاتەیە و لەو بڕوایەداین کە گەلی عێراق بە تێگەیشتوویی و ووشیاری خۆیان و سەرکردەکانیان دەتوانن ئەم قۆناغەش تێپەڕێنن و بەمەش ئاشتی و سەقامگیری لە عێراق ببینین./.
