بەرپرسانی باڵای عێراق بەردەوام پێداگری لەوە دەکەن کە ئەرکی هێزەکانی ناتۆ لەم وڵاتە تەنیا مەشق و ڕاهێنان و ڕاوێژکارییە و ئەگەر بەرپرسیاریەتی شەڕکردنیان هەبێت، تەنیا بە شێوازی سنوردار و بۆ هێرشە ئاسمانییەکانە.
تەحسین خەفاجی وتەبێژی فەرماندەیی پرۆسە هاوبەشەکانی عێراق لەو کاتەدا ڕایگەیاند کە لێدوانەکانی ئەمینداری گشتی ڕێکخراوی ناتۆ سەبارەت بە زیاترکردنی ژمارەی هێزەکانیان لە عێراق دوورە لە ڕاستییەوە. واسم ئەعرەجی ڕاوێژکاری ئاسایشی نیشتمانیی عێراقیش ڕایگەیاند کە ئەرکی هێزەکانی ناتۆ تەنیا ڕاوێژکارییە.
سەرەڕای هەرای لێدوانەکانی ئەمینداری گشتی ناتۆ لە عێراق و هەڵوێستی بەشێکی زۆری لایەنە سیاسییەکانی ئەم وڵاتە و ناڕەزایەتییان بەرامبەر بە مانەوەی هێزە چەکدارە بیانییەکان، بەڵام ڕێکخراوی ناتۆ هیچ کات ئەو لێدوانەی ڕەتنەکردووەتەوە یان پاشەکشەی لێنەکردووە.
پاش تێپەڕبوونی چوار مانگ بە سەر ئەو لێدوانەدا وەزارەتی بەرگری عێراق و ڕێکخراوی ناتۆ لەم ماوەیەدا یادداشتێکی لێک تێگەیشتنی هاوکارییان واژۆ کرد کە واژۆکردنی ئەوەش سەرەڕای ئاشکرانەبوونی وردەکاری و ناوەڕۆکەکەی، بە بۆچوونی هەندێک تەنیا لە پێناو زیاترکردنی ژمارەی هێزەکانە لە عێراق.
هەندێک سەرچاوەی نافەرمیی نزیک لە حکومەتی عێراق ڕایانگەیاندووە کە ئەم یادداشتە تەنیا ئامانجی ئەوەیە کە هێزەکانی ئەمریکا لە ڕێگای ناتۆوە لەم وڵاتەدا بمێننەوە. واشنتن دەیەوێت بە بیانووی کۆتایی ماوەی مانەوەی هێزەکانی لە عێراق، لە ڕێگای ناتۆوە جارێکی دیکە بەردەوامی بە بوونی سەربازیی خۆی لەم وڵاتەدا بدات.
دوو ساڵە کە واشنتن سەرقاڵی پیلانگێڕی و فریوە تا بە بیانووی کۆتایی ماوەی مانەوەی هێزەکانی لە عێراق، ئەمجارە لە چوارچێوەی ناتۆ پەرە بە بوونی سەربازی خۆی و بنکە سەربازییەکانی لە عێراقدا بدات و بەمەش یاسای پەسەندکراوی پەرلەمانی عێراق بۆ کشانەوەی هێزەکانی بێ کاریگەر بکات.
ئەمریکییەکان بە هەماهەنگی ناتۆ ئەم پیلانەیان دەستپێکردووە و ڕەنگە خوێندندوەشیان ئەوە بێت کە عێراقییەکان تەنیا بە هەستیارییەوە لە بوونی هێزەکانی ئەمریکا لە وڵاتەکەیان دەڕوانن و ئیشیان بە هێزەکانی ناتۆوە نییە و ئەمەش دەرفەتە بۆ مانەوەی ئەمریکییەکان لە عێراق.
پەرلەمانی عێراق لە پاش تیرۆری شەهیدان حاجی قاسم سولێمانی و ئەبومەهدی موهەندیس و هاوڕێکانیان لە فڕۆکەخانەی بەغدا لە لایەن تیرۆریستانی ئەمریکاوە، یاسای دەرکردنی هێزەکانی ئەو وڵاتەی پەسەند کرد و حکومەتی عێراقیش لە وتووێژە دووقۆڵییەکانی لە گەڵ واشنتن لە حوزەیرانی 2020 تا تەمموزی 2021 لە سەر کشانەوەی ئەو هێزانە تا کۆتایی 2021 گەیشتە ڕێکەوتن. بەڵام هێزەکانی ئەمریکا لە بنکە سەربازییەکانی عەین ئەسەد لە ڕۆژئاوای پارێزگای ئەنبار و هەریر لە پارێزگای هەولێر ماونەتەوە و بە ئاسانی لە سنورەکانی نێوان عێراق و سوریاش جموجوڵ دەکەن.
ئێستا کە حکومەتی نوێی عێراق پێکنەهاتووە، پێشبینی دەکرێت لە داهاتوودا ئەم پرسە ببێتە کێشەیەکی گرنگ لە بەردەم بەغدا و بە پێی یاساکەی پەرلەمان و خواستی زۆرینەی عێراقییەکان چارەنووسی ئەمریکییەکان سەرشۆڕی و کشانەوەیە./.
