بە پێی ڕاپۆرتی جام کوردی، عائد هەلالی لە ئەندامانی باڵای چوارچێوەی هەماهەنگی لایەنە سیاسییەکانی شێعەی عێراق سەبارەت بە هێرشە مووشەکییەکەی سوپای پاسداران بۆ سەر بنکەیەکی سیخوڕی و پیلانگێڕی ڕژێمی زایۆنیستی لە هەولێر وتی: نابێت سیاسەتی دووفاقی لەم پرسەدا پەیرەو بکرێت لە بەر ئەوەی کە ئەگەر باس لە پێشێلکردنی سەروەری بکەین فڕۆکە شەڕکەرەکانی عێراقیش بە چەندین جار بنکە و بارەگاکانی تیرۆریستانیان لە سوریا بۆردومان کردووە، ئایا ئەمە پێشێلکردن نییە؟ ئەگەر ئەمە پێشتر بە هەماهەنگی دیمەشق بووە، تارانیش ڕایگەیاندووە کە پێشتر هەماهەنگیی لە گەڵ بەغدا کردووە.
هەلالی وتی: ڕاستییەکە ئەوەیە کە حکومەتی ناوەندیی عێراق لاوازە، کاتێک سەبارەت بە شەهیدبوونی ئەبومەهدی موهەندیس لە لایەن ئەمریکاوە سکاڵایەکی نێودەوڵەتیی تۆمار نەکرد، هەروەها سەبارەت بە تیرۆری شەهید سولێمانی وەک میوانی فەرمیی حکومەتی عێراق، دەبێت ئەوەمان لەبیر بێت کە ئێران ڕۆڵی گرنگی لە پاراستنی دەسەڵاتی عێراقدا هەبووە، کاتێک کە هێزەکانی بۆ پاراستنی عێراق و لەناوبردنی تیرۆریستانی داعش ناردە وڵاتی ئێمە.
ئەو سیاسەتمەدارە عێراقییە وتی: نابێت ئێران بە پێشێلکردنی سەروەری عێراق تۆمەتبار بکرێت، ئێران پێشتر سەبارەت بە بوونی زایۆنیستەکان لە هەولێر و بەئامانجگرتنی ژمارەیەک لە کەسایەتییەکانی لەو بنکەوە، حکومەتی بەغدای ئاگادار کردووەتەوە.
ناوبراو بە ئاماژە بەوەی کە هێرشە مووشەکییەکەی سوپا بۆ سەر بنکەی سیخوڕیی ڕژێمی زایۆنیستی لە هەولێر کاریگەریی لە سەر دانوستانی نێوان لایەنە سیاسییەکانی عێراق نابێت، وتی: سەعید خەتیب زادە وتەبێژی وەزارەتی دەرەوەی ئێران ڕایگەیاند کە هێرشی سەر زایۆنیستەکان لە هەولێر بە ڕەزامەندی و هەماهەنگی لە گەڵ حکومەتی عێراق بووە./.
