جام کوردی – زیاتر له ١٥ رۆژ په‌ى به په‌ى یاوه‌رى هه‌ڵبژارده‌ى عێراقى بۆ تۆپى ده‌ستى كرد و له گه‌وره‌ترین ده‌ستكه‌وتى مێژووى كیشوه‌رى ناوى نووسرایه‌وه و به كراوه‌یش باس له داهاتووى ئه‌و تیپه ده‌كات كه ئێسته هه‌موو چاوه‌كانى وه‌رزشى عێراق و ته‌نانه‌ت كیشوه‌رى ئاسیاشى له‌سه‌ره پاش ئه‌وه‌ى پله‌ى شه‌شه‌میان له پاڵه‌وانێتى تۆپى ده‌ستى ئاسیا بۆ كوڕان له سعودیه مسۆگه‌ر كرد و ته‌نیا یه‌ك هه‌نگاویش مابوو بۆ پاڵه‌وانێتى جیهان سه‌ربكه‌ون به‌ڵام جیاوازى دوو گۆڵ ئه‌و پلیته‌ى به عێراق نه‌به‌خشى .
له دوا ساته‌كانى مانه‌وه‌ى هه‌ڵبژارده‌كه له شوێنى حه‌وانه‌ى هه‌ڵبژارده‌ى عێراق له هۆتێل میرۆسرى له شارى ده‌مامى سعودیه گفتوگۆیه‌كم له‌گه‌ڵ “كامه‌ران حه‌سه‌ن”ى ئه‌ندامى یه‌كێتیی تۆپى ده‌ستى عێراق ئه‌نجامدا تاوه‌كو سه‌رنج و بۆچوونى له كۆى گشتى به‌شداربوونیان له‌و پاڵه‌وانێتییه‌و داهاتووى ئه‌و یارییه‌و هه‌ڵبژارده‌كه بزانم .
كامه‌ران حه‌سه‌ن، ئه‌ندامه كورده‌كه‌ى یه‌كێتیی تۆپى ده‌ستى عێراق كه له‌گه‌ڵ سه‌رۆكى یه‌كێتییه‌كه سه‌رۆكایه‌تى شاندى هه‌ڵبژارده‌كه‌یان له وڵاتى سعودیه كرد، له دیدارێك له نێو جه‌رگه‌ى پاڵه‌وانێتییه‌كه‌وه باسى له‌وه كرد، هه‌ڵبژارده‌ى تۆپى ده‌ستى ئاماده‌كارییه‌كانى به قه‌باره‌ى هه‌ڵبژارده زلهێزه‌كان و به‌شداره‌كانى دیكه زۆر كه‌م بوو، عێراق به چه‌ند هه‌فته‌یه‌ك كه‌مپێكى مه‌شق و راهێنانى له ئێران ئه‌نجامداو دواتر چه‌ند رۆژێك له قه‌ته‌ر پاشان گه‌ڕایه‌وه دواتر هاته وڵاتى سعودیه بۆ به‌شداریكردن له‌و پاڵه‌وانێتییه، له كاتێكدا هه‌ڵبژارده به‌شداره‌كانى دیكه چه‌ندین مانگ به‌شدارى كه‌مپ و مه‌شقى راهێنانیان كردبوو، له وڵاتانى ده‌ره‌وه، سعودیه‌ى میواندار چه‌ند رۆژێك گه‌شتى ئیتاڵیاى كرد بۆ كه‌مپێكى مه‌شق و راهێنان و وڵاته‌كانى دیكه‌ش هاوشێوه .
كامه‌ران حه‌سه‌ن وتیشى، موئمن شه‌ریفى راهێنه‌رى میسرى هه‌ڵبژارده‌ى تۆپى ده‌ستى عێراق به چه‌ند هه‌فته‌یه‌ك پێش پاڵه‌وانێتییه‌كه گرێبه‌ستى ئیمزا كرد دواى ئه‌وه‌ش تیپه‌كه‌ش كه گه‌شتى كرد به كه‌م و كوڕیه‌وه له رووى یاریزان هات چونكه یاریزانی پێكراوى هه‌بوو كه یه‌كێك له باشترین و سه‌ره‌كیترین یاریزانى هه‌ڵبژارده‌كه بوو گه‌شتى نه‌كرد .
ئه‌ندامه‌كه‌ى یه‌كێتیی تۆپى ده‌ستى عێراق دەڵێت، راهێنه‌رى تۆپى ده‌ستى عێراق كه‌سایه‌تیه‌كى ناسراوى ئه‌و یارییه و به‌ڵێنى ئه‌وه‌ى داوه تیپێكى تۆكمه و به‌هێز و داهاتووى بۆ عێراق دروست بكات كاتێك گرێبه‌ستى ئه‌م تیپه‌شى كرد كه‌س مه‌رجى بۆ ئه‌م پاڵه‌وانێتییه نه‌بوو، به‌ڵام ئه‌و له یه‌كه‌م ده‌ركه‌وتنیه‌وه ئه‌و ئه‌نجامه‌ى به‌ده‌ستهێنا كه بووه تووشى شۆك بوونى ته‌واوى كیشوه‌ره‌كان.
كامه‌ران حه‌سه‌ن وتیشى، ئه‌و راهێنه‌ره میسرییه به‌رنامه‌یه‌كى تۆكمه‌ى هه‌یه رۆژى یه‌كى مانگى داهاتوو ده‌گاته شارى سلێمانى و ئاماده‌ى گردبوونه‌وه‌ى دووه‌مى پاڵه‌وانێتیی عێراق بۆ یانه‌كان ده‌بێت كه له شارى سلێمانى به‌رێوه‌ده‌چێت، له‌وێشه‌وه فۆرماتى هه‌ڵیژارده‌كه ده‌ست پێده‌كات و چه‌ندین یاریزانى نوێ ده‌خاته هه‌ڵبژارده‌كه‌وه و هاوكات چه‌ند یاریزانیش له پێكهاته‌كه‌ش دوورده‌خاته‌وه، هاوكات راشیگه‌یاندوه كه به نیازه ره‌گه‌زاندن ( تجنیس ریاچی ) بۆ چه‌ند یاریزانێك بكات، چونكه هه‌موو لایه‌ك ده‌زانن كه وڵاته‌كانى ترى كیشوه‌ره‌كه نیوه‌ى زیاتریان ره‌گه‌زاندیان بۆ یاریزانه‌كان كردووه واته یاریزانى ترى وڵاتانیان هێناوه .
ئه‌و ئه‌ندامه‌ى یه‌كێتیی تۆپی دەستی عێراق وتیشى کاروانی داهاتووی بەشداریکردنە لە یارییەکانی ئاسیاد لە چین و یارییەکانی وڵاتانی ئیسلامی لە تورکیا .
ده‌مام – هه‌رێز جه‌مال
