جام کوردی – یەکێکی تر لەو کچە یاریزانانەی ناوێکی دیارە لە وەرزشی کوردستان و عێراق و خاوەنی دەیان نازناو و دەستکەوتە، کچە یاریزانی تۆپی سەرمێزی یانەی پێشمەرگە،”مینا حەسەن”ە.
مینا کێیە ؟
مینا حەسەن، کچە یاریزانێکی تۆپی سەرمێزی یانەی پێشمەرگەی سلێمانیم و باڵام 170سم و کێشم 55کیلۆگرامە .
کەی دەستت بە وەرزشکردوە ؟
لە تەمەنی منداڵییەوە حەزم بۆ وەرزش هەبووە تا لە ساڵی 2015 بەفەرمی پەیوەندیم بە یانەی پێشمەرگەی سلێمانیەوە کردوە و بەردەوامم تا ئێستا لەو یانەیە.
کێ هاندەرو هاوکارتە کە تۆ تەمەنێکە لەو یارییەیت و خاوەن ئەنجامی بەرزی ؟
زۆر سوپاسی مامۆستا بەڵێن ئەکەم کە هاوکارو یارمەتیدەرمە و مەشق و ڕاهێنانی پێ کردوین بێ دابڕان وە هۆکاری سەرکەوتنەکانی منە، زۆر سوپاسی دایک و باوکم ئەکەم کە هەمیشە هاوکارو پشت و پەنای منن، وە زۆر سوپاسی سەرۆکی یانەو و جێگرو ئەندامانی یانەکەم ئەکەم کە هەمیشە پاڵپشت و هاوکارمانن.
تەنیا بۆ پێشمەرگەی سلێمانی یاریت کردووە ؟
نەخێر، لەگەڵ یانەی ئەمینیەی تورکی بەشێوەی خواستن یاریم کردوە .
بەشداری کام پاڵەوانیەت کردووە؟
بەشداری دەیان پاڵەوانێتیم کردوە ، پێنج نازناوی کوردستانمان هەیە و ۳ نازناوی عێراق لەگەڵ یانەی پێشمەرگەی سلێمانی ،٢ پاڵەوانێتی یانەکانی عەرەب بەشدار بوین و یەک پاڵەوانێتی نێو دەوڵەتی لە تورکیاش بەشدار بوین.
ئەم وەرزە بە نیازی چیت ؟
سوپاس بۆ خوا لە رۆژانی رابردوو گرێبەستم لەگەڵ یانەی پێشمەرگە نوێکردەوە، دەمەوێت پشت بەخواو یارمەتی راهێنەرو هاوکاری یاریزانانی تیمەکەم زۆر جیاواز دەرکەوین و لە پاڵەوانێتییەکان بە ئەنجامی گەورە ناومان تۆمار بکەین .
