پۆڵا سیروان تاڵەبانی، ئەندامی مەکتەبی سیاسی یەکێتی نیشتمانی کوردستان، لە وتووێژی لە گەڵ پەیامنێری جام کوردی، سەبارەت بە ڕووداوەکانی بەغدا و ئەوەی لە گۆڕەپانی سیاسی عێراقدا دەگوزەرێت، وتی: لە سەرەتاوە ئێمە وەک یەکێتی لە گەڵ پارتی دیمۆکراتی کوردستان و لایەنەکانی دیکە بڕیارمان وابوو کە نەبینە بەشێک لە ململانێ ناوخۆییەکانی شێعە و دەبێت هەوڵی یەکخستنی ناوماڵی خۆمان بدەین.
ناوبراو وتی: سیاسەتی یەکێتی ئەوە بوو کە کورد لە بەغدا لە گەڵ لایەنە شێعەکان لە دژی لایەنێکی دیکە ڕێکنەکەوێت و وەک کورد دەبێت خاوەنی پرۆژەیەکی نیشتمانی بۆ داکۆکی لە سەر مافەکانی خۆمان بین و ڕۆڵی ئاشتیانەش لە نێوان لایەنە شێعەکاندا بگێڕین.
ئەندامەکەی مەکتەبی سیاسی یەکێتی نیشتمانی کوردستان لە درێژەدا وتی: ئەو ڕێکەوتنەی پارتی لە گەڵ حەلبوسی و سەدرییەکان بووەتە هۆی نیگەرانی ناوماڵی شێعە و کەرتکردنی ئەوان.
ناوبراو سەبارەت بە پۆستی سەرۆک کۆماری عێراقیش وتی: ئەو پۆستە بۆ کورد و یەکێتی نیشتمانی کوردستان دەزانین و هەوڵی بەردەوامی بۆ دەدەین و کاندیدی خۆمان بۆی دیاری کردووە.
پۆڵا سیروان تاڵەبانی سەبارەت بەوەش کە باس دەکرێت مەسعود بارزانی سەرۆکی پارتی دیمۆکراتی کوردستان ڤیتۆی لە سەر دووبارە کاندیدکردنەوەی بەرهەم ساڵح هەیە، وتی: وەک یەکێتی نیشتمانی کوردستان پێمان وایە کە هەر پۆستێک مافی هەر لایەنێک بێت تەنیا مافی ئەو لایەنەیە کە کاندیدی خۆیی بۆ دیاری بکات و لایەنی دیکە هیچ مافێکی بە سەریەوە نییە، ئەم شێوازە بیرکردنەوەیە بڕیاردانێکی هەڵەیە و بۆ سەرۆک کۆماریش کە مافی یەکێتییە تەنیا مافی ئەم حیزبەیە کاندیدی خۆیی بۆ دیاری بکات.
وتووێژ: سەردەشت محەممەد
