بە پێی ڕاپۆرتی جام کوردی، مەسرور بارزانی سەرۆکی حکومەتی هەرێمی کوردستان لە چاوپێکەوتنی کەناڵی سکای نیوزی عەرەبی، پەیوەندییەکانی نێوان هەولێر و بەغدای بە باش ناو برد و وتی کە داعش هێشتا لە چەندین ناوچەی عێراقدایە و وەک هەڕەشەیەکی گەورە دادەنرێت.
ناوبراو سەبارەت بە پەیوەندییەکانی نێوان هەولێر و بەغدا وتی: بە دڵنیاییەوە کە پەیوەندییەکانی ئێمە باشتر بووە و بە تایبەت لە گەڵ مستەفا کازمی سەرۆک وەزیرانی عێراق ئەو پەیوەندییە نزیکە دەبینرێت بەڵام چەندین کێشە لە مێژە لە نێوان هەر دوو لادا ماوەتەوە. لە نێوان ساڵانی 2014 و 2017 هیچ بڕە بودجەیەک لە لایەن بەغداوە بە هەرێمی کوردستان نەدرا و بۆ ئەمەش هەرێم قەرزی لە کۆمپانیا نەوتییەکان، بازرگاکانی کورد و تەنانەت بانکی ناوەندی کرد و لە ئەنجامی ئەمەش ملیاران دینار قەرزی هاتووەتە سەر.
بارزانی لە وەڵامی پرسیارێک سەبارەت بە بوونی گەندەڵی، وتی: ئەوەی باس دەکرێت جیاوازیی لە گەڵ ڕاستییەکاندا هەیە، ئێمە ناڵێین کە گەندەڵی لە کوردستاندا بوونی نییە بەڵام بەراورد بە عێراق ڕێژەی گەندەڵی لە هەرێمی کوردستاندا کەمترە و لە هەوڵی بەردەوامداین بۆ بنبڕکردنی ئەو گەندەڵییەش.
سەرۆکی حکومەتی هەرێمی کوردستان پەیوەندییەکانی هەولێری لە گەڵ ئەمریکا بە باش ناو برد و سەبارەت بە کشانەوەی هێزەکانی ئەو وڵاتەش، وتی: ئەوان وەک دۆست و هاوپەیمان هاتنە عێراق و لە ڕووخانی دەسەڵاتی دیکتاتۆریی سەدام لە ساڵی 2003 و هەروەها لە شەڕی داعش هاوکارییان کردووە.
مەسرور بارزانی لە بەشێکی دیکەی ئەو چاوپێکەوتنەدا پەیوەندییەکانی هەرێمی کوردستانی لە گەڵ تورکیا و ئێران بە ئاسایی ناو برد و لە وەڵامی پرسیارێک سەبارەت بە پێگەی ئێران لە عێراقدا وتی: لە بەغدا حکومەت هەیە و دەبێت هەڵسەنگاندن بۆ دۆخەکە بکات و بزانێت وڵاتانی دراوسێ چەند پێگە و دەستڕۆیشتووییان هەیە. ئێمە لە هەرێمی کوردستان هیچ دەستێوەردانێک قبووڵ ناکەین و هەوڵی باشترین پەیوەندی لە گەڵ وڵاتانی دراوسێ دەدەین و هیوادارین بەغدا بۆ باشترکردنی پەیوەندییەکان لە گەڵ وڵاتانی دراوسێ بە مەرجی نەبوونی دەستێوەردان لە کاروباری ناوخۆیی یەکتر هەنگاو بنێت.
ناوبراو هەروەها وتی: عێراق بە تەنیا ناتوانێت ڕوبەڕوی کێشە ئابوری و ئەمنییەکان ببێتەوە، بە واتای ئەوەی کە بەشداری دۆستانی عێراق بە تایبەت ئەمریکا و هاوپەیمانی نێودەوڵەتی بۆ شەڕی دائش و هاوکارییە ئابورییەکان هێشتا گرنگە و هیوادارین ئەوان تا باشتربوونی دۆخی عێراق بمێننەوە./.
