محەممەد محەممەد سەعید، وەزیری ڕۆشنبیری حکومەتی هەرێمی کوردستان، لە وتووێژی تایبەت لە گەڵ پەیامنێری جام کوردی، سەبارەت بە پەیوەندییە کەلتوری و ڕۆشنبیرییەکانی نێوان کۆماری ئیسلامی ئێران و هەرێمی کوردستان، وتی: دەبێت وەزارەتی ڕۆشنبیری حکومەتی هەرێم و هەر دوو کۆنسووڵخانەی ئێران لە هەولێر و سلێمانی لە هەوڵی هاوبەشدابین بۆ تێکەڵکردن و ناساندنی کەلتورەکان بە یەکتر و بۆ ئەمەش هەنگاوی سەرەتایی هەڵگیراوە.
ناوبراو وتی: کردنەوەی پێشانگای کاری دەستیی ژنانی ئێرانی و ژنانی هەرێمی کوردستان لە سلێمانی یەک لەو کارانەیە و وەک وەزارەتی ڕۆشنبیری پشتگیری لەو کارە هاوبەشانەش دەکەین.
وەزیری ڕۆشنبیری حکومەتی هەرێم وتی: لە سەرجەم بوارەکانی وەک کتێب، پیشەسازی دەستی، هونەر، ئەدەب، شانۆ، سینەما و سەرجەم بوارە ڕۆشنبیرییەکان دەمانەوێت پەرە بە پەیوەندییەکان بدەین و وەزارەتی ڕۆشنبیری بە پێی توانای خۆی پشتگیری مادی و مەعنەوی لەو کارە هاوبەشانە دەکات.
محەممەد محەممەد سەعید لە درێژەدا داوای لە ناوەندە کەلتوری و ڕۆشنبیرییەکانی هەرێمی کوردستان و کۆماری ئیسلامی ئێران کرد کە بۆ یەکتر ناسین و پەرەپێدان بەو پەیوەندییە کۆن و مێژووییەی نێوانیان هەنگاو بنێن.
ناوبراو وتی: پەیوەندی نێوان گەلی کورد و گەلانی ئێران بە پەیوەندییەکی کۆن و مێژوویی دادەنرێت و ئەو هاوبەشییە مێژووییەش بووەتە هۆکاری بەهێزبوونی پەیوەندییەکانی ئێستای نێوان هەرێمی کوردستان و کۆماری ئیسلامی ئێران.
وەزیری ڕۆشنبیری حکومەتی هەرێمی کوردستان سەبارەت بە پێشانگاکەی سلێمانیش ڕایگەیاند کە کارێکی هاوبەشی کۆنسووڵخانەی ئێران و لقی سلێمانی سەندیکاری کرێکارانی کوردستان بووە کە لە ڕووی یەکترناسین و ئاشنایەتی لە گەڵ کەلتورەکان و هەروەها پەرەپێدان بە کاری هاوبەش لە نێوان هەر دوو لا گرنگی و بایەخی زۆری هەیە./.
