بە پێی ڕاپۆرتی جام کوردی، عادل کەریم سەرپەرشتیاری وەزارەتی کارەبای عێراق جەختیکردەوە کە ئەم وڵاتە یەک مانگە هیچ کارەبایەکی لە ئێران هاوردە نەکردووە.
ناوبراو وتی: بەشێکی زۆری کێشەکانی کارەبای عێراق نەگەڕانەوەی پارەی وەزارەتی کارەبایە لە لایەن خەزێنەی عێراقەوە و تا ئێستا لە بودجەی 2021 هیچ بودجەیەک بۆ وەزارەتی کارەبا وەرنەگیراوە و وەزارەتەکە لە ڕێگای قەرزەوە بەڕێوە دەبرێت.
سەرپەرشتیاری وەزارەتی کارەبای عێراق ڕایگەیاند کە وەبەرهێنانی کارەبای ئەم وڵاتە لە ئێستادا 19 تا 21 هەزار مێگاواتە.
ناوبراو وتی: ماوەی یەک مانگە کە هیچ کارەبایەک لە ئێران هاوردەی عێراق نەکراوە و ئەگەر گازی ئێرانیش نەبێت لە عێراق کارەسات ڕوو دەدات.
عادل کەریم وتی کە ئەگەر بودجەی پێویست هەبێت لە ماوەی 5 ساڵدا عێراق کێشەی کارەبا بە تەواوی چارەسەر دەکات.
وتیشی کە لە داهاتوویەکی نزیکدا گرێبەستی دابینکردنی 500 مێگاوات کارەبای بەسرە لە گەڵ کوێت واژۆ دەکرێت./.
