مەسعود عەبدولخالەق، شارەزا و چاودێری سیاسی هەرێمی کوردستان، لە وتووێژی لە گەڵ پەیامنێری جام کوردی سەبارەت بە ئەنجامی هەڵبژاردنەکانی ئێران و سەرکەوتنی سەید ئیبراهیم ڕەئیسی و کاریگەری لە سەر پەیوەندییەکانی تاران لە گەڵ هەرێم و عێراق بە گشتی، وتی: پەیوەندییەکانی ئێران لە گەڵ عێراق و هەرێمی کوردستان کاریگەری لە چەند فاکتەرێکی دیکە وەردەگرێت و هێندە بە دەست لایەنێکی وەک هەرێم نییە، بۆ نموونە، پەیوەندییەکانی نێوان عێراق و وڵاتانی کەنداوی فارس، یان پەیوەندییەکانی نێوان عێراق و ئەمریکا، بە تایبەت ئەو ڕێکەوتننامە ئەمنییەی کە بڕیارە لە نێوان هەر دوو لادا واژۆ بکرێت.
ناوبراو وتی: لە گۆڕانکارییەکاندا چەند ئاراستەیەک هەیە کە بەشێکی لە قازانجی ئێران و بەشێکی دیکە ڕەنگە لە قازانجی نەبێت، یەک لەوانە کشانەوەی هێزەکانی ئەمریکایە کە وا دەکات پەیوەندییەکانی نێوان ئێران و هەرێم و عێراق باشتر بێت، بەڵام تێڕوانینی وڵاتانی عەرەبی ناوچەی کەنداو پێچەوانەی ئەمەیە، هاوکات تورکیا کە دەورێکی زۆری هەیە و تەنیا بە پەیوەندییەکانەوە لە گەڵ عێراق و هەرێم نەوەستاوە و هێزەکانی هێناوەتە خاکی عێراق و چەند مەلەفێکی مێژوویی و یاساییشی هەڵداوەتەوە، هەر بۆیە هەرێمی کوردستان دەرفەتێکی وەهای نەماوە کە وەک پێش ڕیفراندۆم بیر بکاتەوە، ڕای گشتی و زۆربەی حیزبەکان لە هەرێمی کوردستان ڕێکەوتنیان لە گەڵ حکومەتی عێراق دەوێت، یان ئەوەی کە ئێران بەراورد بە تورکیا نەبووەتە مەترسی لە سەر هەرێمی کوردستان.
چاودێری سیاسی کورد لە درێژەدا لە وەڵامی پرسیارێک سەبارەت بە داهاتووی پەیوەندییەکانی بەغدا و تاران و ئەوەی کە مستەفا کازمی باسی پەیوەندی بەهێزی خۆیی و سەید ئیبراهیم ڕەئیسی کردووە، وتی: لە لایەن ئەمریکا و ئەورووپا و چەند وڵاتێکەوە نۆ پرۆژەی ئاشکرا لە سەر رۆژهەڵاتی ناوەڕاست هەیە، هەندێک وڵاتی وەک تورکیا و ئێرانیش بە ئاشکرا پرۆژەی خۆیان ڕانەگەیاندووە، پرۆژەی تورکی زیاتر گرنگی بە بواری سەربازی دەدات و ئێرانیش برەوی بە ئایدۆلۆژیا و مەزهەب داوە کە ڕەنگە تێچووی کەمتری بوێت، بەشێکی زۆری عێراقییەکان لەم بوارەدا لە گەڵ ئێران هاوبەشییان هەیە و ڕەنگە لە پاش کشانەوەی هێزەکانی ئەمریکا هاوکارییەکانی نێوان ئێران و عێراقیش زیاتر ببێت، هەر سەرۆک وەزیرانێکی عێراق دەبێت ڕەچاوی پەیوەندییەکانی وڵاتەکەی لە گەڵ ئێران بکات کە تا ئێستاش وابووە، بە لای کازمییەوە بوونی پەیوەندییەکی دیپلۆماسی لە نێوان بەغدا و تاران گرنگە، واتە هاوسەنگی لە پەیوەندییەکان، دەبێت ئاماژە بە ڕۆڵی گرنگی سەرۆک کۆماری عێراقیش لە پەیوەندییەکان لە گەڵ ئێران بدەین و ئەو هاوکارییەی عێراق لە پرسی گەمارۆکان کە ڕێگریی لەوە کرد ئێران کاریگەری زیاتری لە سزاکانی سەردەمی ترەمپ بەرکەوێت.
مەسعود عەبدولخالەق سەبارەت بە ئەگەری ڕێگریی ئەمریکا لە گەشەی پەیوەندییەکانی نێوان عێراق و ئێران، وتی: بە شکستی ترەمپ و سەرکەوتنی بایدن لە ئەمریکا بواری نوێ بۆ ئێران هاتووەتەوە، بە بۆچوونی من یەک هاوکێشە هەیە کە ئێران ناتوانێت هاوکات ململانێی ئەمریکا بکات و لە لایەکی دیکەوە نەخشە و پلانەکانی لە ناوچەکەش جێبەجێ بکات، هاتنی بایدن گوشارەکانی پێشووی لە سەر ئێران هێور کردووەتەوە و ئەمەش دەرفەتێکی باشە بۆ ئەم وڵاتە کە بتوانێت پلان و پرۆژەکانی لە ڕۆژهەڵاتی ناوەڕاست جێبەجێ بکات، من لەم چوارچێوەدا گەشەیەک لە پەیوەندییەکانی نێوان ئێران و عێراق دەبینم بەڵام ناڕەزایەتییە ناوخۆییەکان لە دژی حکومەتی عێراق کاریگەری لە سەر ئێرانیش دەبێت. ئەمریکا بە هەستیارییەوە لە پەیوەندییەکانی نێوان بەغدا و تاران دەڕوانێت و لە سەردەمی ترەمپ تەنانەت لە زۆر بواردا ڕێگریش کراوە، ڕەنگە هەندێک وڵاتیش بەرتیلی ئەوە بدەنە ئەمریکا کە بە وتەی خۆیان ئێران عێراق لە دەستیان دەرنەهێنێت.
وتووێژ: هاودەنگ محەممەد
