بە پێی ڕاپۆرتی جام کوردی، کۆبوونەوەی سێقۆڵی نێوان مستەفا کازمی سەرۆک وەزیرانی عێراق، عەبدوڵڵای دووەم شای ئەردەن و عەبدولفەتاح سیسی سەرۆک کۆماری میسر لە شاری بەغدا بەڕێوەچوو. بەرهەم ساڵح سەرۆک کۆماری عێراقیش لە نیوەڕۆخوانێکدا بەرپرسانی باڵای ئەم وڵاتە و شاندەکانی میوانی پێکەوە کۆکردەوە.
سەرۆک کۆماری عێراق وتی کە هاوکاری نێوان عێراق، میسر و ئەردەن وەرچەرخانێکی گەورەیە لە ناوچەکە و هەنگاوێکی گرنگە بۆ چەسپاندنی ئاسایش و سەقامگیری و هاوکاری ئابوری و پشت بەستن بە وتووێژ بۆ چارەسەرکردنی کێشەکان و ڕوبەڕوبونەوەی ئاستەنگەکان بە تایبەت بنبڕکردنی تیرۆر و توندڕۆیی و بەهێزکردنی هاوبەشی ئابوری و بازرگانی و دابینکردنی هەلی کار بە تایبەت بۆ گەنجان.
بەرهەم ساڵح هەروەها جەختی لە سەر گرنگی بەهێزکردنی هەماهەنگی نێوان هەر سێ وڵات و سوودوەرگرتن لە پەیوەندی جوگرافی لە پێناو بەرفراوانکردنی هاوکاری لە بوارەکانی ئابوری و بازرگانی و گەشەپێدان و بونیادنانی ژێرخانی ئابوری و پرۆژەکانی نەوت و وزە کردەوە./.
