بە پێی ڕاپۆرتی جام کوردی، جێگری پارێزگاری کرماشان بۆ کاروباری هەماهەنگی ئابوری ڕۆژی سێ شەممە 22 ی 6 ی 2021 لە ڕێوڕەسمی ناساندنی بەڕێوەبەری نوێی گومرکی ئەم پارێزگایە، وتی: کرماشان یەکێکە لە پارێزگا سەرکەوتووەکانی ئێران لە بواری هەناردە و سەرەڕای کێشە و گرفتەکان تا ئێستا ئەم پرۆسەش بەردەوام بووە.
بێهزاد باباخانی بە ئاماژە بە بەرزبوونەوەی ڕێژەی لە سەدا 8 ی هەناردەی پارێزگای کرماشان لە ساڵی ڕابردووی کۆچی هەتاوی، وتی: لە سێ مانگەی یەکەمی ساڵی 1400 ی کۆچی هەتاوی ڕێژەی هەناردەی پارێزگای کرماشان لە سەدا 22 بەرز بووەتەوە.
گەشە بە هەناردەی پارێزگای کرماشان دەدرێت
بەڕێوەبەری نوێی گومرکی پارێزگای کرماشانیش لەو ڕێوڕەسمەدا وتی کە لە سەرجەم دەفرایەتییەکان بۆ گەشەی هەناردەی پارێزگاکە کەڵک وەردەگیرێت.
بەختیار ڕەحمانی پور بە ئاماژە بە تایبەتمەندییەکانی پارێزگای کرماشان لە ڕووی هەناردەوە، وتی: تا ئێستا هەنگاوی باش لەم بوارەدا هەڵگیراوە و منیش هەوڵ دەدەم بە یارمەتی و هاوکاری بەرپرسانی پارێزگا و لە ناوەندیش، هەلومەرجێکی باشتر بۆ ئەم پارێزگایە دابین بکەین.
بەختیار ڕەحمانی پور پێشتر بەڕێوەبەری گشتی گومرکی پارێزگای کوردستان بووە.
هەناردەی پارێزگای کرماشان گەیشتە زیاتر لە 3 ملیار دۆلار
بەڕێوەبەری پێشووی گومرکی پارێزگای کرماشان لە درێژەی ئەو ڕێوڕەسمەدا ڕایگەیاند کە لە ماوەی بەرپرسیاریەتی خۆی سەرجەم هەوڵەکانی بۆ گەشەی هەناردەی ئەم پارێزگایە بەکار هێناوە و وتی: لە سێ مانگەی یەکەمی ئەمساڵی کۆچی هەتاوی، ڕێژەی هەناردەی نانەوتی و گازی کرماشان گەیشتووەتە 3 ملیار و 421 ملیۆن دۆلار.
خەلیل حەیدەری وتی: لەم ساڵانەی گەمارۆ زاڵمانەکانی دوژمن و بڵاوبوونەوەی ڤایرۆسی کۆرۆنا کێشەی زۆر هاتە پێشەوە بەڵام هیچ کات پرۆسەی هەناردەی پارێزگای کرماشان ڕانەگیرا.
جێی ئاماژەیە کە خەلیل حەیدەری وەک بەڕێوەبەری نوێی گومرکی پارێزگای کوردستان دەستنیشان کرا.
پارێزگای کرماشان بە گشتی 371 کیلۆمەتر سنوری هاوبەشی لە گەڵ وڵاتی عێراق هەیە و خاوەنی 2 خاڵی سنوری فەرمی و 5 بازاڕچەی سنوری چالاکە./.
