د. موئمین زەڵمی مامۆستای زانکۆی گەشەپێدانی مرۆیی لە سلێمانی، لە تووێژی لە گەڵ پەیامنێری جام کوردی سەبارەت بە ڕۆژی جیهانی قودس، وتی: ڕۆژی جیهانی قودس ئەو ڕۆژەیە کە دەبێت هۆشداری بە وڵاتانی زلهێز بدەین کە چیدی ئیسلام لە ژێر دەستی ئێوە و کردارە نەشیاوەکانی ئێوەدا نییە.
ناوبراو بە ئاماژە بە پیلانگێڕییەکانی دوژمنانی ئیسلام وتی: قودس هەموو كات دۆسیەیەکی مرۆیی و ئیسلامی دەمێنێتەوە و بابەتێك نییە لە بازاڕدا مامەڵەی پێوە بكرێت.
دەقی ئەم وتووێژە لە درێژەدا هاتووە:
ڕۆڵ و کاریگەری بڕیارەکەی ئیمام خومەینی (رە) لە دیاریکردنی کۆتای هەینی مانگی پیرۆزی ڕەمەزان وەک ڕۆژی جیهانی قودس چۆن دەبینن؟
قودس قیبلەی یەکەم و حەرەمی دووەمی موسڵمانەکانی جیهان، نیشتمانی ملیۆنان ئاوارەی موسڵمانی فەڵەستینییە کە ڕەوتی ستەمکاری جیهانی لە لایەن ڕژێمی زایۆنیەوە لە ژێر دەستی دانیشتووانەکەیەوە دەریهێناوە و لە ئێستادا لە لایەن داگیرکەرانەوە بەڕێوە دەبرێت. بۆ بەرگری لەو ستەمە گەورەیەش، رۆژی جیهانی قودس کە وا نزیکەی چوار دەیەیە لە ئێرانەوە ڕاگەیانراوە، بڕیارێکی کاریگەرە دژی ئەو جیهانگەرییە ستەمکارانەیەی کە سەرزەوی داگیرکردووە و ماڵ و موڵکی ڕۆژهەڵاتییەکانی تاڵان کردووە، فیکر و بیرکردنەوە و پەروەردەو زمان و فەرهەنگ و کەلەپوورەکەیانی دزیوە. بەرزڕاگرتنی ئەم یادە جەختکردنەوەیە لەسەر ئەو پەیامەی دامەزرێنەری رۆژی جیهانی قودس کە وتی، ڕۆژی قودس ڕۆژێک نییە کە بە تەنیا پەیوەندی بە قودسەوە هەبێت. رۆژی قودس ڕۆژی بەرەنگاربوونەوەی چەوساوەکانە بەرامبەر بە ستەمکاران، ڕۆژی بەرەنگاربوونەوەی زلهێزەکانە. ڕۆژی قودس ئەو ڕۆژەیە کە دەبێت هۆشداری ئەوە بە زلهێزەکان بدەین کە چیدی ئیسلام لە ژێر دەسەڵاتی ئێوە و کردەوە نەشیاوەکانی ئێوەدا نییە.
ئەم بڕیارە تا چەندە دۆسیەی فەڵەستینی بە زیندوویی هێشتووەتەوە؟
بێگومان، رۆژی قودس ڕۆژی بەرەنگاربوونەوەی چەوساوەکانە بەرامبەر بە ستەمکاران، لە ئێستادا جیهان لە ستەم و زوڵم و چەوساندنەوەی هەمەلایەن و فرەبازنەدا دەکوڵێت و تا دێت ژماری قوربانییان زیاتر دەبێت، زەقترین نمونەش ئەو زوڵمە گەورە دەیان ساڵەیەیە کە لە میللەتی ستەمدید و مەزڵومی (فەلەستین) دەکرێت، زلهێزانی جیهان رۆژ دوای رۆژ فەلەستینییەکان لە زێد و وەتەن و نشینگەی خۆیان دەچەوسێننەوە، مافی ژیانیان پێ ڕەوا نابینن. بەلای زلهێزانی جیهانەوە، داگیرکاری فەلەستین و قودس و هەوڵەکانییان بۆ گۆڕینی دیموگرافیای ئەم وڵاتە، تەنها پرسێکی سیاسی و بازرگانی نیە، بۆیەش کاتێک لە بارودۆخەکە ورد دەبینەوە، دەردەکەوێت کە داگیرکردنی قودس دەرگایەکە کە لێیەوە ستەمکاری و سەپاندنی هەژموونی قورخکاری بەرەو رۆژهەڵاتی ناوەڕاست ئاراستە دەکرێت و میللەتانی جیهانی سیێەم زیاتر و زیاتر لە رەسەنایەنی و شارستانیەتی خۆیان تەرە دەکرێن. وەستانەوە دژی ئەم داگیرکارییەش لە جیهاندا رەوتی جیاوازی بەخۆیەوە بینیوەو قۆناغی جیاوازی تێپەڕاندووە، ئەوەی گرنگە ئەوە کە پێویستە شاری قودس و تەواوی شوێنە پیرۆزەكان لە پێشێلكارییەكان بەدووربگرێن، جەختیشی لەسەر پێویستی خستنەگەڕی هەوڵەكان كردەوە بۆ بەدیهێنانی خواست و هیوای گەلی فەلەستین بۆ چەسپاندنی ئاشتی و سەقامگیری و دەستبەركردنی مافە ڕەواكانی، وڵاتی ئێمە لە پێشەنگی بەرگریكاران بووە لە فەلەستین و پرسی فەلەستین-یشی لە نێوەندە نێودەوڵەتییەكاندا بە یەكەم پرس داناوە.
ڕۆژی جیهانی قودس چیمان وەبیردێنێتەوە؟
قودس و مزگەوتی ئەقسا بۆ موسڵمانان و ئومەتی ئیسلامی بە گشتی یەكێكە لە موقەدەساتەكان، موقەدەساتیش شتێك نییە موساوەمەی لەسەر بكرێت یان چاوپۆشی لێبكرێت، ئەم بڕیارەش بڕیارێكی هەڵە و خەتایە بەرامبەر بە ئومەتی ئیسلام و موقەدەساتی موسڵمانان، جگە لەوەش موقەدەساتی مەسیحییەكانیشە، پرسی قودس پرسێکی مێژوویی و موقەدەساتی و مەعنەوییە و تەنازولی لەسەر ناكرێت و كارێكی هەڵەیە. هەوڵەکان بۆ داگیرکاری قودس، ھۆکاری وروژاندنی ھەست و نەستی زۆربەی خەڵکی دنیایە لەدژی داگیرکەرن، کە ئاوا تاکڕەوانەو بەبێ گوێدانە دامەزراوەو نێوەندە نێودەوڵەتییەکان، بڕیاری ھێندە مەترسیدار دەدات، بەرگری لە ستەمدیدەکانی جیهان و وەستانەوە دژی ستەمکارانی جیهانی و بەکرێگیراوەکانیان لە ناوچەکە و جیهان دەبێت ئەرکی هەر مرۆڤێکی ئازادیخواز و شۆڕشگێڕ لە جیهان بێت لەسەر هەر بیروڕا و مەزهەبێک بێت.
ئەرکی موسڵمانان بۆ ڕوبەڕوبونەوەی پیلانگێڕی گرێبەستی سەدە کە هەوڵێکی دوژمنانە بۆ لەبیرکردنی دۆسیەی فەڵەستین، چییە؟
لە یەکەمین پەیامی ڕاگەیاندنی رۆژی جیهنی قودسەوە، تێدەگەین کە، ڕۆژی قودس، رۆژێکە بۆ وتنی راستی بە دەنگی بەرز دژی داگیرکارییەکان، رۆژی قودس ڕۆژی بێداری ئیسلامە و پێویستە هەمیشە بە سەوزی رابگیردرێت، بزوووتنەوەیەکی بێداری و وهۆشداری و وەستانەوە بوو دژی ستەمکارییەکان.دۆسێی فەلەستین دۆسێی مسوڵمانانی جیهانە و پشتیوانی لێدەكەین، قودس هەموو كات دۆسێیەكی مرۆیی و ئیسلامیی دەمێنێتەوە و بابەتێك نییە لە بازاڕدا مامەڵەی پێوە بكرێت. چارەنووسی گەلانی زوڵملێکراو پێویستە دیاری بکرێت، دەبێت گەلانی زوڵملێکراو خۆیان لە بەرامبەر ڕەوتی ستەمکاری پیشان بدەن، ڕۆژی قودس وێستگەیەکی جیهانییە بۆ وەستانەوا دژی داکیرکاری و ستەمکاری و قرتاندنی هەموو هەوڵێکی گۆڕینی شوناس و ناسنامە و فەرهەنگ و کلتور و کەلەپوری وڵاتانی ڕۆژهەڵات.
من پێم وایە، ڕۆژی قودس جگە لە کلیلێک بۆ کردنەوەی دەرگای خۆڕاگری و وەستانەوە دژی داگیرکاری، دەرفەتێکی گونجاوە بۆ یەکگرتوویی ستەملێکراوانی جیهان تا شکۆ و گەورەیی خۆیان بە ڕەوتی ستەمکاری جیهان پیشان بدەن و بەرگری لە مافەکانی خۆیان بکەن، ئاراستەی گۆڕانکارییەکانی ناوچەکە و هەوڵە گوماناوییەکان تا دێ زیاتر دەبن بەڵام هێزی بەرخودان و گیانی بەرگریکاری تا دێت سەوزتر دەبێت.
وتووێژ: هاودەنگ محەممەد
