بە پێی ڕاپۆرتی جام کوردی، سەها داود نەجاڕ سەرۆکی دەستەی وەبەرهێنانی عێراق ڕایگەیاند کە لە کۆی 2322 پرۆژە ساڵی ڕابردووی ئەم وڵاتە تەنیا 613 پرۆژە تەواو کراون.
ناوبراو وتی کە 750 پرۆژەی دیکەش دواکەوتنی بەرچاویان هەبووە و جێبەجێکردنیان بەرەوپێشچوونی ئەوتۆی نەبووە.
سەرۆکی دەستەی وەبەرهێنانی عێراق وتی: پاش بڕیارەکەی مستەفا کازمی بۆ ڕاگرتنی ئەو پرۆژانەی کە 3 ساڵ بە سەریاندا تێپەڕ بووە و بەرەوپێشچوونیان نەبووە، موڵەتی زیاتر لە هەزار پرۆژە هەڵوەشاوەتەوە.
ناوبراو وتی: بە هەڵوەشانەوەی ئەو پرۆژانەش دەیان ملیار دۆلار بۆ خەزێنەی حکومەت دەگەڕێتەوە و بەدەر لەمەش هەزاران هێکتار زەوی بۆ دەستەی وەبەرهێنان دەگەڕێنێتەوە.
بە وتەی نەجاڕ، پارەی ئەو پرۆژانە دەگاتە 70 ملیار دۆلار و ئەو زەوییانەش کە بۆ پرۆژە وەهمییەکان تەرخان کراون لانیکەم بڕی 60 ملیار دۆلار دەبێت.
وتیشی کە لەو بڕوایەدام ئامارەکان دوو هێندە زیاترین و بۆ ئەوەی خەڵک تووشی شۆک نەبن وا بڵاو بووەتەوە.
هاوپەیوەند لە گەڵ ئەمەش، سەلیم محەممەد بازرگان و چالاکوانی ئابوری عێراق ڕایگەیاندووە کە وەرگرتنی موڵەتی وەبەرهێنان یەکێک لە دژوارترین قۆناغەکانی چالاکی ئابورییە و تەنانەت لە جێبەجێکردنی پرۆژەکەش دژوارترە./.
