بە پێی ڕاپۆرتی جام کوردی، محەممەد جەواد زەریف وەزیری دەرەوەی ئێران و شاندی یاوەری لە بارەگای مەکتەبی سیاسی یەکێتی نیشتمانی کوردستان لە شاری هەولێر لە گەڵ بافڵ تاڵەبانی و لاهور شێخ جەنگی هاوسەرۆکانی ئەم حیزبە کۆبوونەوە.
بە گوێرەی ڕاگەێندراوێکی یەکێتی نیشتمانی کوردستان، لەو کۆبوونەوەدا وتووێژی ورد و هەمەلایەنە لە سەر پێویستی پتەوکردنی پەیوەندییەکان، هەماهەنگی، کاری هاوبەش و بەهێزکردنی هاوکاری ئابوری و بازرگانی نێوان هەرێمی کوردستان و کۆماری ئیسلامی ئێران کرا.
لە درێژەی ڕاگەێندراوەکەدا هاتووە کە هاوسەرۆکانی یەکێتی نیشتمانی کوردستان جەختیان لە سەر ئارامی و سەقامگیری ناوچەکە کردەوە و ئاشتی و ئاسایشی عێراق و هەرێمی کوردستان بە فاکتەرێکی گرنگ بۆ پاراستنی و ئارامی وڵاتانی دراوسێ ناو برا.
ڕاشیگەیاندووە کە هاوسەرۆکانی یەکێتی نیشتمانی کوردستان جەختیان لەوە کردووەتەوە کە ڕێکەوتنی نێوان ئێران و ئەمریکا دەتوانێت ببێتە هۆکاری سەقامگیری بۆ ناوچەکە بە گشتی و عێراق و هەرێمی کوردستان بە تایبەتی.
لە کۆتایی ڕاگەێندراوەکەدا هاتووە کە وەزیری دەرەوەی ئێرانیش پێگەی یەکێتی نیشتمانی کوردستانی لە ئاستی عێراق و ناوچەکە بە بەهێز ناو بردووە و ئامادەیی تارانیشی بۆ پەرەپێدانی پەیوەندییەکان لە گەڵ عێراق و هەرێمی کوردستان لە سەرجەم بوارەکان پیشانداوە./.
