بە پێی ڕاپۆرتی جام کوردی، بەرهەم ساڵح سەرۆک کۆماری عێراق جەختی لە سەر دەستەبەرکردنی شەفافیەت لە هەڵبژاردنەکانی داهاتوو کردەوە و وتی کە ئەم هەڵبژاردنانە کۆتا دەرفەتی بەردەم سیستەمی سیاسی عێراقە.
ناوبراو وتی: خەڵک دەبێت بتوانن ئازادانە ئەوەی بە شیاوی دەزانن لەم هەڵبژاردنانەدا هەڵیبژێرن.
سەرۆک کۆماری عێراق وتی: عێراقییەکان هەڵبژاردنەکانی پێشوویان بایکۆت کرد لە بەر ئەوەی کە ئیرادەی خۆیان لەو هەڵبژاردنانەدا بەدی نەدەکرد و هەر ئەمەش وایکرد کە بزوتنەوەیەکی جەماوەری لە عێراقدا دەست پێبکات.
بەرهەم ساڵح وتی: گەنجانی بەسرە، نەجەف، سلێمانی، موسڵ، شەنگال و شارەکانی دیکە یەک داواکاری هاوبەشیان هەیە کە ژیانێکی باشتر و دەرفەتێکی یەکسانی کارکردنیان دەوێت.
ناوبراو وتی: هاووڵاتیان لە سەرجەم ناوچەکانی عێراق لەم دۆخەی ئێستا ناڕازین و داوای چاکسازی بنەڕەتی دەکەن و لە ئێستادا بزوتنەوەیەکی جیدی و جەماوەری بۆ چاکسازی لە سیستەمی حکومەتدا سەریهەڵداوە./.
