بە پێی ڕاپۆرتی جام کوردی، سەرەڕای ئەوەی کە لە ماوەی چەند هەفتەی ڕابردوو کەشێکی سەقامگیر بۆ پێکهێنانی کابینەی نوێی لوبنان بەدیکرا و ئاراستەکە بەرەو چارەسەربوونی کێشە سیاسییەکان دەڕۆیشت بەڵام سەرچاوەیەک لەو وڵاتە ڕایگەیاندووە کە ئەستەمە لە داهاتوویەکی نزیکدا کابینەی نوێی لوبنان پێک بهێندرێت.
سەعد حەریری و هاوپەیمانەکانی لە بڕیارەکەی میشل عون سەرۆک کۆماری لوبنان بۆ وردبینی لە کاروباری دارایی حكومەتدا توڕەن و هاوکات وەلید جونبەلات سەرۆکی پارتی سۆسیالیستی پێشکەوتنخوازیش پاڵپشتیی لە بڕیارەکەی عون کردووە. سەعد حەریری بە عەلی حەسەن خەلیل ئەندامی پەرلەمانی لوبنانی ڕاگەیاندووە کە جونبەلات خیانەتی پێکردووە.
بەدەر لە کێشەی وردبینی لە کاروباری دارایی حکومەت، بەربەستێکی گەورەی دیکە لە بەردەم پێکهێنانی کابینەی نوێی لوبنان دەبینرێت و ئەویش گوشارەکانی ئەمریکا و سعوودیە لە سەر سەرۆک وەزیرانی ڕاسپێردراوە بۆ ئەوەی کە بەشداری بە نوێنەرانی حیزبووڵا لە کابینەدا نەکرێت، هەر بۆیە هیوایەک بە پێکهێنانی کابینەی نوێ لە لایەن حەریرییەوە نییە و ناوبراو زیاتر لەوەش ناتوانێت پرۆسەی پێکهێنانی کابینە دوور بخاتەوە.
بەرپرسێکی باڵای لوبنان بە بێ ئەوەی کە ناوەکەی ئاشکرا بکرێت بە ماڵپەڕی النشرە ی ڕاگەیاندووە کە جێگرەوەی سەعد حەریری ئامادەیە، بە بێ ئەوەی کە وردەکاری زیاتر بخاتەڕوو.
باڵیۆزی ئەمریکا لە لوبنان بە ڕاشکاوانە ڕایگەیاندووە کە سەعد حەریری نابێت نوێنەرانی حیزبووڵا لە کابینەکەیدا بەکار بێنێت. وتیشی کە واشنتن دژایەتی حیزبووڵا لە کابینەی لوبناندا دەکات.
پاش تەقینەوە بەهێزەکەی بەندەری بەیروت و دەست لە کار کێشانەوەی حەسان دەیاب، سەعد حەریری بووەتە کاندیدی ڕاسپێردراو بۆ پێکهێنانی کابینەی نوێ بەڵام زیاتر لە پێنج مانگە هێشتا دیار نییە کە لوبنان کەی دەبێتە خاوەنی حکومەتی نوێ، ئەویش لە کاتێکدا کە ئەو وڵاتە بە قووڵترین قەیرانی ئابوریدا تێپەڕ دەبێت./.
