بە پێی ڕاپۆرتی جام کوردی، حوسێن عەرەب سەرۆکی کوتلەی ئیرادە لە پەرلەمانی عێراق وتی: سەرجەم کوتلە سیاسییەکانی شێعە لە قەیرانی نێوان هەرێم و بەغدا ترسیان هەیە، بۆ ئەوەی کە ئەگەر ڕێکەوتن لە سەر نەوت و بودجە نەکرێت هاوپەیمانیەتی نێوانیان نامێنێت.
ناوبراو وتی کە لایەنە سیاسییەکانی سوننە لەو بڕوایەدان کە قەیرانی هەرێم و بەغدا پەیوەندیی بەوانەوە نییە.
ئەو ئەندامەی پەرلەمانی عێراق هەروەها وتی: ئەگەر هەولێر و بەغدا لە دانوستانەکانی تایبەت بە نەوت و بودجە نەگەنە ڕێکەوتن، پرۆژەیاسای بودجەی ساڵی 2021 لە ڕێگای زۆرینەی پەرلەمانییەوە پەسەند دەکرێت.
وتیشی کە هەرێمی کوردستان نیازی ئەوە نییە نەوتەکەی ڕادەستی کۆمپانیای سۆمۆ بکات./.
