بە پێی ڕاپۆرتی جام کوردی، سەید عەمار حەکیم لە وتارێکدا لە گۆڕەپانی خەلانی بەغدا وتی کە هیوادارین تێڕوانین و پرۆژەکانی حکومەتی نوێی ئەمریکا سەبارەت بە ناوچەی ڕۆژهەڵاتی ناوەڕاست جیاوازتر بێت.
ئاسایش و سەقامگیری ناوچەکە
ناوبراو لە میانەی وتارەکەیدا کە بە بۆنەی ڕۆژی شەهیدی عێراق بەڕێوەچوو، داوای گەڕانەوەی بەپەلەی ئەمریکا بۆ ڕێکەوتنی ناوەکی و هەڵگرتنی گەمارۆکانی ئێرانی کرد و ئەم بڕیارانەی بۆ گەڕانەوەی ئاسایش و سەقامگیری بۆ ناوچەکە بە پێویست ناو برد.
سەرۆکی هاوپەیمانی عێراقیون هەروەها داوای دانوستانی بەربڵاوی وڵاتانی ناوچەکەی کرد و وتی کە خاڵە هاوبەشەکانی مێژوویی، جوگرافی، ئائینی و کەلتوریی ئەم وڵاتانە زیاترە لە ناوکۆییە سیاسییەکان و قەیرانەکانی ئێستا.
حەکیم وتی کە گوشارە ئابورییەکان و هەڕەشەی سەربازی یارمەتیدەری چارەسەربوونی کێشەکان ناکات بەڵکوو ناکۆکییەکان تەنیا لە ڕێگای دانوستان و وتووێژەوە چارەسەر دەکرێت و ئەم داواکارییەش بۆ ئەوەیە کە عێراق لە گۆڕەپانی ململانێکان بە دوور بێت و هەمووان عێراقێکی خاوەن سەقامگیری و ئاسایش لە ناوچەکە ببینن.
خۆپێشاندانەکانی عێراق
سەید عەمار حەکیم بە ئاماژە بە خۆپێشاندانەکانی ساڵی ڕابردوو لە عێراق بە داواکاری ڕەوای خەڵکی ئەم وڵاتە ناوی برد و وتی کە دژی ئەوەین توندووتیژی بەرامبەر بە خۆپێشاندەران بەکار بهێندرێت.
ناوبراو وتی کە کاتی ئەوە هاتووە هەمووان لە سەر شوناسێکی یەکگرتوو و هەبوونی وڵاتێکی پێشکەوتوو و دادپەروەر بگەینە ڕێکەوتن کە سیستەمێکی کۆمەڵایەتی و سیاسی نوێ دەسەڵاتی بەڕێوە ببات.
مەرجەعیەتی باڵای عێراق
سەرۆکی ڕەوتی حیکمەی نیشتمانی عێراق لە بەشێکی دیکەی وتارەکەی جەختیکردەوە کە مەرجەعی باڵای ئائینی لە سەرجەم قۆناغەکاندا داوا لە خەڵک دەکات یەکگرتوو بن و پابەندی حکومەت و دەستوور و یاسای وڵات و بەرگری لە دەسەڵات و بەرژەوەندییەکانی بن.
کشانەوەی هێزەکانی ئەمریکا لە عێراق
حەکیم وێڕای دووبارەکردنەوەی بڕیارەکەی پەرلەمان سەبارەت بە دیاریکردنی خشتەی کاتی بۆ کشانەوەی هێزەکانی ئەمریکا لە عێراق وتی کە هەنگاوەکانی عێراق لەم بوارەدا دەبێت تەنیا لە ڕێگای دامەزراوە فەرمییەکانەوە بێت و هیچ کەس مافی ئەوەی نییە هەنگاوێکی تاکلایانە هەڵبگرێت کە ببێتە هۆی لاوازبوونی دەسەڵات، حکومەت و دامەزراوەکانی.
هەڵبژاردنی پێشوەختەی عێراق
سەرۆکی ڕەوتی حیکمەی عێراق هەڵبژاردنەکانی پێشوەختەی ئەم وڵاتەی بە قۆناغێکی گرنگ لە هاوکێشەکان ناو برد و داوای لە سەرجەم لایەنەکان کرد لەو هەڵبژاردنانەدا بەشدارییەکی کارا و کاریگەر و بەربڵاویان هەبێت.
ناوبراو دیسانەوە جەختی لە سەر تێپەڕاندنی قۆناغی هاوپەیمانییە مەزهەبی و نەتەوەییەکانی کردەوە و وتی کە هیوادارین هەڵبژاردنەکانی داهاتوو سەروەری و دەسەڵاتی نیشتمانی عێراق بەهێز بکات.
پرسی فەڵەستین
حەکیم لە کۆتاییدا بە ئاماژە بە کێشەی فەڵەستین و سیاسەتەکانی ڕژێمی زایۆنیستی وتی کە پاڵپشتی بێسنوری عێراق لە گەلی فەڵەستین بەردەوام دەبێت و بە تێپەڕبوونی کات تووشی گۆڕانکاری نابێت./.
