بە پێی ڕاپۆرتی جام کوردی، ئاسەوارە مێژوویی و شوێنە گەشتیارییەکانی شیراز بووەتە هۆی ڕاکێشانی ژمارەیەکی زۆر لە گەشتیارانی ناوخۆیی و بیانی. لێرەدا ئاماژە بە ژمارەیەک لەو شوێنانە دەدرێت.
قەڵای کەریم خان:
ئەم قەڵایە شوێنێکی سرنجڕاکێشە. کەریم خانی زەند لە ساڵی 1108 ی کۆچی هەتاوی فەرمانی دروستکردنی ئەو قەڵایەی دەرکرد. ناوبراو قەڵاکەی بۆ مانەوەی بنەماڵەی دەسەڵاتدار بەکار دەهێنا بەڵام لە سەردەمی قاجاڕەکان بووە شوێنی نیشتەجێبوونی کەسانی دیکە.
لە سەردەمی پاڵەوییەکان ئەم قەڵایە وەک گرتووخانەیەک بەکار هێنرا، ئەڵبەت دواتر نۆژەن کرایەوە و بووە شوێنێکی گەورەی گەشتیاری.
قەڵای کەریم خان لە ڕووی بیناسازییەوە تایبەتمەندییەکی زۆری هەیە. کاتێک دەچیتە ئەم بینایە، حەوشەیەکی گەورە و جۆگە ئاوێکی لە گەڵ کۆمەڵە دار و سەوزاییەکی زۆری تێدایە. پیاسەکردن لەم قەڵایە چێژێکی زۆر بە گەشتیاران دەبەخشێت.
ڕێستورانتی حەوت خوان:
کە سەردانی شیراز دەکەیت ناتوانیت چاو بە ڕووی خواردنەکانیدا دابخەیت، لەم شارەدا چەندین ڕێستورانتی بەناوبانگ هەیە، بۆ نموونە، ڕێستورانتی حەوت خوان کە لە ئێراندا ناوبانگی هەیە.
ئەم ڕێستورانتە حەوت شوێنی هەیە کە لە هەر شوێنێکدا چەشنە خواردنێک پێشکەش دەکات. لە حەوت خواندا شێوازی بیناکە لە هەر نهۆمێک بە پێی ئەو خواردنەی کە دەدرێت، جیاوازە.
حەمامی وەکیل:
دەتوانین بڵێین کە ئەمە جوانترین حەمامی مێژوویی ئێرانە. لە ڕیزی کۆمەڵەی زەندیەدایە کە لە لایەن کەریم خانەوە فەرمانی دروستکردنی درا. لە ڕووی بیناسازییەوە بە خاوەن جوانی و تایبەتمەندییەکی زۆر دادەنرێت.
لە تەنیشت حەمامی وەکیل دەتوانن بازاڕی وەکیل ببینن.
باخی ژاڵە:
باخی ژاڵە وەک باخەکانی دیکەی شیراز نییە، لێرەدا بەرهەمە گیاییەکان بە ئاسانی دەست دەکەوێت و بە یەکێک لە کۆنترین و ناسراوترین فرۆشگەکانی شیراز دادەنرێت.
ئاوی لیمۆی شیراز کە ناوبانگی زۆری هەیە لە باخی ژاڵەدا بەرهەم دێت.
نەخشی ڕۆستەم:
تەختی جەمشید لە شیراز ناوبانگی جیهانیی هەیە و ژمارەیەکی زۆر لە گەشتیارانی بیانی سەردانی دەکەن بەڵام نەخشی ڕۆستەم کەمتر گرنگیی پێدراوە.
لە نەخشی ڕۆستەم ئاسەواری سەردەمی عیلامی، هەخامەنشی و ساسانی دەبینرێت. لێرەدا پاشا بەناوبانگەکانی وەک داریۆش، خەشایارشا، ئەردەشیری یەکەم و داریۆشی دووەم نێژراون.
باخی جیهان نما:
ئەوانەی کە سەردانی شیراز دەکەن ئەم باخەش بەسەر دەکەنەوە کە بە یەکێک لە شوێنە گرنگەکانی شیراز هەژمار دەکرێت.
باخەکە لە سەدەی هەشتەمدا کراوەتەوە.
ماڵی زینەتولمولک:
ماڵی زینەتولمولک یان مۆزەخانەی مادام توسۆ لەو شوێنانەیە کە کەمتر لە شیراز دەناسرێت. لە سەردەمی قاجاڕییەکان کراوەتەوە.
شوێنە گەشتیارییەکانی دیکەی شیراز:
شیراز وەک چۆن کە ئاماژە درا، شوێنی گەشتیاری زۆری تێدایە. وەک تەختی جەمشید، پاسارگاد، باخی ئێرەم و حافزیە.
لە نزیک شاری شیرازیش باخ و کانیاوی زۆر هەیە و بە دڵنیاییەوە کە سەردانیکردنی ئەم شارە بیرەوەرییەکی زۆر بە گەشتیاران دەبەخشێت.
