رێكخراوی كۆچی نێودەوڵەتی ئاماری ساڵی 2015ی ئاشكرا كرد و رایگەیاند، دوای سووریا و ئەفغانستان، عێراق بەڕێژەی 7% پلەی سێەمی زۆرترین كۆچبەری گرتووە. راشیگەیاندووە، یەك ملیۆن كۆچبەر گەیشتوونەتە كیشوەری ئەوروپا، بەو هۆیەشەوە قاچاخچییەكان یەك ملیار دۆلار قازانجیان كردووە.
به پێی ڕاپۆرتی جام کوردی به گێڕانه‌وه له ڕووداو و بەگوێرەی راپۆرتی كۆتایی ساڵی 2015ی رێكخراوی كۆچی نێودەوڵەتی “لەمساڵدا ژمارەی كۆچبەران سێ بۆ چوار هێندە، بەراورد بە ساڵی 2014، بەرزبووەتەوە، رێژەی گیان لەدەستدانیش ساڵی رابردووی تێپەڕاندووە”.
بەپێی ئامارەكان تاوەكو رۆژی 21-12-2015 بە كۆی گشتی یەك ملیۆن و پێنج هەزار و 504 كەس گەیشتوونەتە وڵاتەكانی یۆنان، بولگاریا، ئیتاڵیا، ئیسپانیا، ماڵتا و قوبرس، زۆرینەشیان، كە دەگاتە زیاتر لە 816 هەزار كەس، لەڕێگەی یۆنانەوە چوونەتە خاكی ئەوروپا.
بەگوێرەی ئامارەكانی رێكخراوەكە، یەك ملیۆن كۆچبەر لە ساڵی 2015 گەیشتوونەتە خاكی ئەوروپا، لەكاتێكدا سێ هەزار و 700 كۆچبەر پێش گەیشتن بەو كیشوەرە، گیانیان لەدەستداوە، كە زۆرینەیان بەهۆی خنكانەوە بووە.
زۆرینەی كۆچبەران دوو رێگایان گرتووەتەبەر، كە یەكێكیان رێگەی دەریای ناوەڕاست و ئەوی دیكەش دەریای ئیجە بووە.
لەبارەی ناسنامەی كۆچبەرەكان، رێكخراوی كۆچبەرانی نێودەوڵەتی رێژەی 50% كۆچبەرەكان سووری بوون، كە بەهۆی شەڕەوە وڵاتەكەیان جێهێشتووە. هاوكات رێژەی 20% ئەفغانستانی و 7% عێراقی بوون.
لەبارەی رێگای گەیشتنی كۆچبەرەكان، رێكخراوی كۆچی نێودەوڵەتی ئاماژەی بەوەكردووە، زۆرینەی رەهایان لەرێگەی قاچاخچییەكانەوە رێگەكەیان گرتووەتەبەر، بەو پێیەش “قاچاخچییەكان لانی كەم یەك ملیار دۆلاریان دەستخستووە”.
بەگوێرەی زانیارییەكان قاچاخچییەكان بۆ هەر كەسێك نزیكەی “دوو هەزار دۆلار بۆ شەش هەزار دۆلار”یان وەرگرتووە.
