لە یادی 21 ساڵەی ماڵئاوایی كردنی مامۆستا “رەسوڵ بێزار گەردی” كە بەدرێژایی زیاتر لە پەنجا ساڵەی تەمەنی هونەری، ویستمان بزانین بۆچی جیا لە هونەرمەندان و حەیرانبێژانی تر، ئەو چەندین نازناو و پاشناوی پێبەخشراوە، وەك (پاشای حەیران) و (میری حەیرانی كورد) و (شێخی حەیرانبێژان) و (مامۆستای مەقام و حەیران) و چەندین نازناوی تر، ئەم نازناوانەش هەر لە خۆڕا و تەنها لەبەر هەوداریی وخۆشەویستی پێینەبەخشراوە، بەڵكو چەندین هۆ و هۆكاری خۆیان هەیە، لەم یادەشدا بیروڕای چەندین نووسەر و هونەرمەندی ناوداری خۆمان سەبارەت بەم كەڵە هونەرمەندە و هۆی نازناوەكانی دەخەینەڕوو.
من تەنیا لەبەر ئەوە لە رەسوڵ گەردی نزیك نەبووم چونكە هونەرمەند بوو، بەڵكو داهێنەرێكی سروودی نیشتمانی بوو، بۆ من نەهاتووە بڵێم هێندەی حەزرەتی (نالی) لە جێتی ئەم حەیرانە شارەزا بوو، بەڵام رەسوڵ گەردی چی لەوكەمتر نەبوو.
رەسوڵ گەردی گرنگیەكی زۆری بەشیعری خۆی داوە لەرووی دانان و ئاواز و چڕینیانەوە، هەروەها بۆ ئەوەی ڕزگاریان ببێ لەفەوتان هەوڵیدەدا بڵاویان بكاتەوە، تەنها ئەوانەی بڵاودەكردەوە ئەوەی خۆی ئاوازی بۆ دادەنا و دەیانیچڕی.
وەك ئاشكرایە رەسوڵ بێزار گەردی لەسەرەتای ژیانی هونەریدا، حەیرانی باو و بەناوبانگی سەردەمی خۆی بەئاواز ووتوە(كە ئەمەش دەچێتە پاڵ داهێنانەكانی هونەرمەند)، بەڵام لەدواییدا خۆی حەیرانی داناوە و چاپ و بڵاویكردوونەتەوە، ئەمانیش شەقلی گشتیی حەیرانی دەشتی هەولێریان تێدابەدی دەكرێ، و بەسۆز و چێژ و بلیمەتی هونەرمەندانەش قانگ دراون وچەند لاپەڕەیەكیشی لەتۆماری حەیران زیاد كردووە. لە شیعرە بڵاوكراوەكانیشی دەردەكەوێت هەموویان بۆ مەبەستی ئاواز و گۆرانی دانراون (لیریكین)، نەك شیعرێك بۆ خوێندنەوە بێ وەكو چیرۆك و ڕۆمان.
* د. عەزیز گەردی دەڵێت: من دوو جار رەسوڵ بێزار گەردی هونەرمەندی ناوداری كوردم ناسی، جارێكیان لەدوورەوە كە تازە قوتابی سەرەتایی بووم لەپەنجاكان لە گوندی بەحركە، تازە رادیۆ هاتبووە دێ، هەموو ئێواران لەدیوەخان و سەرماڵی رادیۆدارەكانەوە چریكەی حەیرانەكانی رەسوڵ بێزار گەردی بەرز دەبۆوە و گوندی پڕدەكرد. خەڵكی بەحركە ئەوەندە عەوداڵی دەنگی مام رەسوڵ بوون، چونكە خۆی گەردی وخۆیی بوو، شانازییان پێوە دەكرد كە گەردییەك بگاتە بەغدا و لەوێوە لەرێگای رادیۆوە گۆرانی بۆ هەموو دونیا بچڕێ، هەروەها گۆرانییەكانی بەزۆری حەیران و مەقام و بەستە بوون، لە ڕۆحی میللەتەوە هەڵقوڵاوبوون و تا ناخ لەگەڵ ڕۆحی لادێدا دەگونجان. لەوساوە گەورەیی مام رەسوڵ لە مێشكی ئێمەی ئەوسا منداڵ چەسپابوو. وەكو مرۆڤێكی بەرز و هونەرمەندێكی لێهاتوو بیرمان لێ دەكردەوە. كە لە پایتەختدا چریكەی دەگاتە هەموو دونیا و بەنێو رادیۆدا دێتەوە ناو دێكەمان.
جاری دووەمیش مام رەسوڵ بێزار گەردی پیاوێكی قسەخۆش و پۆشتە و پەرداخ و دڵكراوەبوو.
حەزی لەجوانترین بەرگ و خۆشترین خواردن دەكرد. هەمیشە بەدەستە بەرگێكی تازە و پاكوخاوێن و بە چەفیەێكی گەورە و رێشوودارەوە دەگەڕا. تابڵێی پیاوێكی سەخی تەبع ودڵ فراوان و میوان پەروەر و بەخزمایەتی بوو، نەفسی زۆر بەرز بوو.
* عەزیز شاهرۆخی بۆ “هەولێر” دەڵێت: لە تەمەنی 17 – 18 ساڵیمدا كە رادیۆی بەغدا بەرنامەی كوردی بڵاودەكردەوە، لە رووی ئەو رادیۆیەوە من دەگەڵ گۆرانیبێژانی ئەو سەردەمە ئاشنا بووم وەكو، مامۆستا تاهیر تۆفیق، حەسەن جزیری، مەقام بێژێكی زۆر گەورەی بۆتانی بووە، كە كابووكێی گوتووە، و من گوتوومەتەوە و لە منڕا بڵاوبۆوە، هەروەها رەسوڵ بێزار گەردی، كە بە نەزری منەوە گەورەترین حەیرانبێژی كوردە، نە لە پاش وی و نە لە پێش ویش حەیرانبێژی وامان نەبووە، من بۆخۆم حەیرانم گوتووە هەر لە رووی حەیرانەكانی وی گوتومەتەوە، هەروەك چۆن لاوكی (گەنج خەلیل) م لە رووی لاوكی (كاوێس ئاغا) گوتووە.
* هۆمەر دزەیی دەڵێت: رەسوڵ بێزار گەردی چاپتەرێكی نەخشین و زۆر درەوشاوەیە لە مێژووی هونەری رەسەنی كوردیی، جگە لەوەی كە دەنگێكی زوڵاڵ و خۆش و بێگەردی هەبوو، حەیرانیشی لە فەوتان و وونبوون رزگار كرد، لە قۆناغێكی تایبەتمەندیی ناوچەییەوە گواستەوە بۆ قۆناغی پەخشكردن لە رادیۆ و تەلەڤزیۆنەكاندا. من هاوڕێیەتیەكی زۆر نزیكم لەگەڵ ئەودا هەبوو، زۆر یەكترمان خۆشدەویست، كەسێكی زۆر قسەخۆش و نوكتەباز و خۆش مەشرەب بوو، پیاو لە مەجلیسی ئەودا قەت تێر نەدەبوو، ئەوەی كە جێگەی داخە هونەرمەندێكی وەك كاك رەسوڵ و كاكە تاهیر هەزار رەحمەت لە گۆڕیان بێت، كاتێك مردن خاوەن هیچ نەبوون. بە بیروڕای من حكوومەت كەمتەرخەمە بەرامبەر بە هونەرمەندە گەورەكانی خۆی. كورد نابێت چاكەی رەسوڵ بێزار گەردی قەت لەبیر بكات.
* ئەنوەر قەرەداغی “هەولێر” دەڵێت: من لەم كەڵە هونەرمەندەوە گوێم بە حەیرانەوە ئاشنابووە، رەسەنایەتی و مۆركی كوردی لە حەیرانەكانی ئەوەوە چووە ناخم، ئێستاش پێموایە كە هەر باس لە رەسەنایەتی هونەری كوردی بكەین، دەبێت حەیران و مەقامەكانی ئەم هونەرمەندە سەرچاوەیەكی گرنگ بن، بۆئەوەی بچینە ناو ئەو سۆزە جوانانەی كە لە میلۆدی كوردیدا هەن، ئەگەر باس لە حەیران بكەین من دەتوانم رەسوڵ بێزار گەردی خوالێخۆشبوو بە باڵیۆزی حەیران دابنێم. تاكە كەس بووە كە بتوانێت وەك پێویست حەیران بەرجەستە بكات بێ ئەوەی بیشێوێنێت، هەرچ نازناوێك بەم هونەرمەندە گەورەیە بەخشرابێت وەك پاشا و میر و میری حەیران، لەوە زیاتر شایستەی ئەوە، چونكە زۆر بە ئەمانەت و لێهاتووانە ئەو كولتورە رەسەنەی پاراستووە و گەیاندۆتە ئێمەوە، بۆیە كە گوێمان لە حەیران دەبێت لە هەر جێیەك بێت یەكسەر ئەم هونەرمەندەمان دێنێتەوە بەرچاو، سۆزەكەی دەمانوەستێنێت و تووشی تێڕامانمان دەكات و لەگەڵ ئەو راستگۆییەدا دەژین كە لە دەنگی رەسوڵ بێزار گەردیەوە پێمان دەگات، بێجگە لە حەیران چەندین میلۆدی جوانی هەبوو كە رەسەنایەتیەكی تەواویان پێوە دیار بوو كە ئاوازی خۆی بوون، ئەگەر بە شێوەیەكی ئەكادیمیانە مامەڵەی لەگەڵدا بكرێت، ئەوا هیچیان كەمترنیە لەو شامیلۆدیانەی كە لە جیهاندا ئەمڕۆ پێشكەش دەكرێت. ئەم هونەرمەندە نەفسێكی زۆر بەرز و عیزەت نەفسێكی بێ وێنەی هەبوو، چاوی بە هەژارێك دەكەوت بەزەیی پێدادەهاتەوە و حەزی دەكرد چی لە گیرفانیدا هەیە بیداتێ.
ساڵی 1974 هەر جارێك بچوویانە نێو ئەو ئۆردوگایانە كە پەناهەندە كوردەكانی خۆمانی تێدابوون و ئەو بارودۆخەی ئەوانی دەبینی، سەیرم دەكرد مام رەسوڵ دەسڕەكەی بە دەموچاویەوە ناوە و دەگریێت و دەیگوت من ئەم كوردە دەبینم دەسووتێم و ئاگر لە هەناوم بەردەبێت، تا بڵێی مرۆڤێكی نمونەیی بوو.
هونەرەكەی ئەو رەگی داكوتاوە لە نێو هەموو كوردستاندا، دەبا ئێمەش بەوەفا بین بۆ خۆی و بۆ ئەو هونەرەی كە بۆی جێهێشتووین.
* خالید سەركار دەڵێت: ئاگاداربووم كە كاتێك یەكێك حەیرانی دەگوتەوە، مامۆستا رەسوڵ بێزار گەردی زۆر رەخنەی لە كەموكوڕیەكان دەگرت لە گوتندا، لە رووی هونەری بەرەنگاریەوەش ئەم هونەرمەندە جێگەی خۆی هەبوو لە گۆرانی نەتەوەیی، چەندین بەرهەمی هەیە لەسەر نەتەوە و نیشتیمان و پێشمەرگە و خاكی كوردستاندا گوتوویەتی، كەسایەتیی ئەو قەت لەبیر ناچێتەوە و خۆشەویست بوو لەناو هەمووماندا و بەتایبەتی لەناو هونەرمەنداندا، زۆر رۆحسووك بوو.
* وریا ئەحمەد دەڵێت: مامۆستا رەسوڵ بێزار گەردی جگە لەوەی كە وەستایەكی بێوێنە بووە لە حەیران، توانی زۆر بوێرانە و ئازایانە ئەو ئەرشیفە دەوڵەمەندەی ناوچەی هەولێر لە حەیران بگەیەنێتە بەشی كوردی لە ئێزگە و تەلەڤزیۆنی بەغدا و لەوێدا بیانپارێزێت، و بیانگەیەنێتە گوێی هەر گوێگرێك لە هەر شوێنێكی ئەم كوردستانە، ئەمەش كارێكە زۆر مایەی شانازییە و كارێكی زۆر گەورەیە، حەیرانبێژەكانی تر هەركەس و لە گوندی خۆی و لە ناوچەی خۆی و لەناو عەشیرەتەكەی خۆی حەیرانی گوتووە و ناسراوبووە. بۆیە ئەو كارەی زۆر بوێرانەبووە، بە رای من ئەو كەڵە هونەرمەندە دەبێت پەیكەری بۆ سازبكرێت.
ئەو هونەرمەندە لەگەڵ ئەوەی كە تا پۆلی پێنجی سەرەتایی خوێندبوو، بەڵام ئافەرین بۆی كە بیری لەوە كردبۆوە كە بەرهەم و حەیرانەكانی خۆی بە كتێب چاپ و ئەرشیفیان بكات و تۆماریان بكات، هەڵبەتە لەسەر ئەركی خۆی هەر چەند ساڵێك كتێبێكی چاپ دەكرد، بەمەش نەمری بە كارەكانی خۆی بەخشی. ئەمەش پێشەنگیەكی دیكەی رەسوڵ بێزار گەردییە.
* رەنجبەر خۆشناو دەڵێت: درود بۆ گیانی پاكی هونەرمەند رەسوڵ بێزار گەردی نەمر، بەڕای من ئەو هەموو نازناوانەی كە پێیبەخشراوە دەگەڕێتەوە بۆ چەند هۆیەك، توانای دەنگی و شارەزایی لە ئەدای تێكستەكانی حەیران، كە زۆر شارەزایانە و وەستایانە هەڵیدەبژاردن و بە دەنگە زوڵاڵەكەی گوێگرانی سەرسام دەكرد. هەرچەندە بوونی كێبڕكێ زیاتر جۆش و خرۆش دەداتە بەرامبەرەكەی، بەڵام مام رەسوڵ بەربەرەكاری هاوشانی نەبوو و هەر ئەو بووە پاڵەوانی مەیدانەكە.
خوڕەوشتی بەرزی و پاك وخاوێنی ناخ و دەروونی مام رەسوڵ زۆر خاڵێكی گرنگە لە ژیانی ئەودا، هەستی نەتەوایەتی مام رەسوڵ لە رادەبەردەر بوو، بۆ شایەدی ئەو كاتە ئێمە لە تیپی موزیكی شۆڕش بووین لە ساڵی 1974، من و مام رەسوڵ بێزار گەردی لە مەریوان بۆ شنۆ بە پاس بەرێكەوتین، هەرگیز لەیادم ناچێت، كاتێ گەیشتینە شنۆ، مام رەسوڵ هەر لەسینگی خۆی دەدا و هاواری دەكرد و دەگریا ” هەی شۆڕشم رۆ. هەی كوردم رۆ” ئێمەشی هەموو بەگریان هێنا.
* شێرزاد سەرسپی”هەولێر” دەڵێت: مامۆستا رەسوڵ بێزار گەردی توانیی حەیران گشتگیر بكات و بیگەیەنێتە هەموو گوێچكەیەك، ئەویش بە پەخشكردنی لە رادیۆ و تەلەڤزیۆنی بەغدا، ئەمەش بوێریەكی زۆر و حەز و عیشقێكی گەورەی ئەو هونەرمەندە دەردەخات بۆ هونەری گۆرانی و مۆسیقا، خاوەن بەهرەیەكی خوایی بوو، توانی بۆخۆی ببێتە قوتابخانەیەكی هونەری رەسەنی كوردی، بەتایبەتی هونەری حەیران، بە شێوەیەكی زۆرجوان و شارەزایانە مەقامی دەچڕی، پیاوێكی خۆش مەعشەر بوو، بێ وێنە و دەگمەن بوو لە هەموو بوارەكاندا، لە گۆرانی گوتنیشدا بەتایبەتی لە حەیران تا ئێستا جێگرەوەی نیە و پەیدانەبووە، كاتێك كە گوێبیستی حەیرانەكانی دەبین، دەمانبەنەوە كەشوهەوایەكی بێ وێنە، بۆیە حەقی خۆیەتی پێی بگوترێت میری حەیرانبێژان، هەروەها شاعیریش بووە و خاوەن چەندین كتێبە و شیعری بۆ گۆرانیەكانی خۆی نووسیوەتەوە، هەروەها ئاوازدانەرێكی خۆڕسكیش بووە، ئاوازی بۆ هەموو بەرهەمەكانی خۆی داناوە، كۆچكردنی ئەو هونەرمەندە گەورەیە زەرەرێكی زۆر گەورە بوو بۆ هونەر و موزیك و بواری كەلەپوری كوردیمان، چونكە بەڕاستی ئەو هەڵگری ئەو ناسنامەیە بوو. هەمیشە هیواخوازی ئەوەین ئەو حەیرانبێژانەی ئەم سەردەمە هەوڵبدەن سوود لە ئەژموونی ئەو مامۆستایە گەورەیە وەربگرن، هەرچەندە زۆر ئەستەمە.
* عەدنان كەریم “هەولێر” دەڵێت: حەیران فۆرمێكە لە مەقامی بەیات، ئەوەی كە زۆر پێمخۆشە یەكێك لەو حەیرانانەی مامۆستای گەورە رەسوڵ بێزار گەردییە كە بە شێوازی مەقامی سەبا گوتوویەتی، من كە گوێ لە دەنگی مامۆستا گەردی دەگرم، شەرم دەكەم حەیران بڵێم، چونكە حەیران تەنها لە زمانی ئەو دێت، لە دەربڕینەكەی ئەو دێت، ئەمە پاشخانێكی گەورەی ناوچەیەكی كوردستانە، كە حەیرانی دەشتی هەولێر و ناوچەی دزەییاتیە، لەوانەیە شێوازی مەقام بۆ من ئاسانتر بێت وەك لەوەی حەیران.
* بورهان خۆشناو دەڵێت: مامۆستا رەسوڵ بێزار گەردی لە رووی جوگرافیەوە شارەزاییەكی تەواوی لەسەر ناوچەكانی هەولێر بە تایبەتی و كوردستان بە گشتی هەبووە، بەمەش ئیلهامێكی جوانی بۆ هاتووە لە داڕشتنی حەیرانەكانی و بەكارهێنانی ئەو شارەزاییە لە تێكستەكانیدا، هەموو كەس نەیانتوانیوە ئەو كارە بكەن، مامۆستا رەسوڵ توانیویەتی مێژوویەكی زێڕین بۆخۆی تۆماربكات لە بواری حەیران و هونەر بە گشتی، و توانیویەتی حەیران لەسەر ئاستی هەر چوار پارچەی كوردستان بناسێنێت.
ئەمەش شانازییەكی گەورەیە بۆ گەلی كورد و بۆ ئەرشیفی گۆرانی و موزیكی كوردی، ئەرشیفێكی چاكی لە بەرهەمەكانی خۆی هەبوو كە لەسەر قەوان تۆماركرابوون، ئاوازدانەریش بووە و بۆخۆی ئاوازی بۆ بەرهەمەكانی خۆی داناوە، زۆربەی تێكستی بەرهەمەكانیشی هەر هی خۆی بووە، چ لە بواری گۆرانی و چ لە بواری حەیرانیش. خاوەن دەنگێكی زۆر زوڵاڵ و كوردی و رەسەن و خۆش بووە، ئومێدەوارم دەزگا هونەرییەكان خوێندنەوە و توێژینەوەی چاك لەسەر بەرهەمەكانی ئەو كەڵە هونەرمەندە بكەن، و بەتایبەتی لەسەر مەقامە كوردیەكان وەكو لاوك و حەیران و قەتار و ئەڵاوەیسی، بۆئەوەی نەوەكانی داهاتوو بتوانن بە شێوازێكی جوان و هونەرییانەتر دووبارەیان بكەنەوە، نەوەك بیشێوێنن.
* فەرهەنگ غەفور دەڵێت: رەسوڵ بێزار گەردی لە رۆژگارێكی زۆر زووەوە دركی بەو بەرپرسیاریەتییە مێژووییە كردووە، كە حەیران ناسنامەی نەتەوەییمانە، ناسنامەی هونەری رەسەنی كوردییە، ناسنامەی رەسەنی میلۆدی كوردییە، ئەگەر لاپەڕەكانی مێژووی هونەری كوردی هەڵدەینەوە، جوانترین لاپەڕە لاپەڕەی رەسوڵ بێزار گەردییە، كە بە میری حەیران ناسراوە، كورد بە گشتی و هەولێریش بەتایبەتی یەكێك لەو شتانەی كە شانازی پێوەدەكات، میلۆدیەكانی حەیرانی كوردیی و دەست و پەنجە و قوڕگە زێڕینەكەی رەسوڵ بێزار گەردییە، ئێمە كاتێك كە گوێبیستی حەیران دەبین بە دەنگی ئەو مامۆستایە، تام و چێژی حەیرانەكانی ئەو جیاوازی هەیە لەگەڵ هەموو ئەو حەیرانانەی كە لەو سەردەمەدا گوێمان لێ دەبێت.
* نایف شێخانی دەڵێت: بە دڵنیاییەوە مامۆستا رەسوڵ بێزار گەردی لە بواری دەنگبێژی و حەیران ناوێكی درەوشاوەیە، بە كۆچباربوونی ئەو بواری مەقام و حەیرانبێژیی كەلێنێكی گەورەی تێكەوت، دیارە بەخشینی ئەو هەموو نازناوانە بەو هونەرمەندە بەرزە نیشانەیەكی دیكەی ئاستی خۆشەویستی و رێز و حورمەتی گوێگران و هەوادارانی بەرفراوانی كوردستانە بۆ هونەری رەسوڵ بێزار گەردی، كە هەمیشە لە ژیانی میللەتاندا ئەو هونەرمەندانە زۆر دەگمەنن بتوانن وەك ئەو بەو شێوە بەرفراوانە بیسەران و هەواداران لە دەوری هونەرەكەیان كۆبكەنەوە و ئەو هەموو نازناوانە بەدەست بێنن .
لە ساڵی 2002 بوو كارم لەسەر چەند حەیرانێك و گۆرانیەكی ئەو هونەرمەندە كرد كە لە ئاوازی خۆی بوو، توانیمان بە موزیكی نوێ سەرلەنوێ تۆماری بكەینەوە، ئەگەر هاوكاریمان بكرێت، ئەوا دەتوانین درێژە بەو پڕۆژەیە بدەین بۆ نوێكردنەوەی ئەو بەرهەمانەی كە موزیكژەنەكانیان كورد نەبوون، بۆ سەرلەنوێ تۆماركردنەوەی ئەو بەرهەمانە.
مامۆستا رەسوڵ بێزار گەردی ئەو ئاوازانەی كە دایڕشتوون، وا هەست دەكەیت كە پڕ بە مەودای دەنگی خۆیەتی، ئەوەش بەهرەمەندی و سەلیقەیی ئەو هونەرمەندە دەگەیەنێت. لەوانەیە نەكرێت باس لەو هەموو ئەو بەهرەمەندیانەی ئەو هونەرمەندە گەورەیە بكەین، هەر لە مەسەلەی تێكست نووسینی حەیرانەكانی و نووسینی هۆنراوە بۆ گۆرانیەكانی و كۆمەڵێك ئاواز بۆ بەرهەمەكانی، لەوەشدا خاوەن بەهرە و سەلیقەیەكی تایبەت بە خۆی بووە. وەكو پێكهاتەی دەنگی ئەو هونەرمەندەش خاوەن پانتاییەكی بەرفراوان بووە و هەست بەو هارمۆنی و جێگیرییە دەكەیت، كە ئەو حەیران دەڵێت جیا لە حەیرانبێژانی تر هەست بە هەناسەبڕكێی و تەنگەتاوی ناكەیت، لە كۆتایی حەیرانەكان و دەربڕین و وەستانەكان هەست دەكەیت كە گوێ لە بەهرەمەندێك و حەیرانبێژێك دەگریت، كە زۆر شارەزایە لە سەوڵ لێدانەكە و ئەو شەپۆڵە دەنگیانە بە تەرازوییەكی جوان و تۆكمە دەیانبڕێت، هەزاران سڵاو لە رووپاكی میری حەیرانبێژانی كورد رەسوڵ بێزار گەردی.
* سابیر عەبدولڕەحمان دەڵێت: بەراستی مافی خۆیەتی پێی بگوترێت مامۆستا، چونكە مامۆستا وشەیەكی زۆر گەورەیە، نەك وەك ئەو سەردەمەی ئێستا، كە هونەرمەندێكی گەنج دێنن و تازە دوو گۆرانی هەیە، لە تەمەنی نەوەی منە و پێی دەڵێن مامۆستا!. رەسوڵ بێزار گەردی توانی بەردی بناغەی هونەری حەیران لە ئێزگە و تەلەڤزیۆن دامەزرێنێت، خاوەن بوێرییەكی زۆر بوو، كە توانی ببێتە یەكەم كەس لەو سەردەمەدا كە حەیران لە ئێزگە و لەگەڵ مۆسیقادا بڵێت و تۆماربكات. ئەوە چاكە و فەزڵێكی زۆر گەورەی ئەو هونەرمەندەیە بۆ هونەری كوردی و بۆ حەیران بە تایبەتی.
ئەو سەردەمی حەیرانبێژ زۆربوون، بەڵام كەس ئەو بوێرییەی نەبووە كە بتوانێت لەگەڵ مۆسیقادا حەیران بڵێت.
ئەو هونەرمەندە ستایلێك و شێوازێكی تایبەتی هەبوو لە حەیران گوتندا، چەندین كەس هەوڵی لاسایی كردنەوەیان داوە و دەدەن، بەڵام نەیانتوانیوە وەك ئەو بەو توانا و شارەزاییەی ئەو حەیران بڵێنەوە. ئەو توانی حەیران بە شێوە رەسەنەكەی هەولێر كە كانگای حەیرانە، جێگیر بكات و بۆمان بپارێزێت. حەیرانەكانی بە شێوەیەكی وا دەگوت كە گوێگر لەگەڵیان بلاوێتەوە. لەرینەوەیەكی تایبەتی لە دەنگیدا هەبوو، خوای گەورە ئەو لەرینەوەی خەڵقكردبوو تەنها بۆ ئەو و بۆ حەیران، هەتا بڵێی كەسێكی نیشتیمان پەروەر بوو، دڵساف و دڵسۆز و خاك وڵات و نەتەوەی خۆی زۆر خۆشدەویست.
* غەفور مەخموری دەڵێت: حەیرانەكانی رەسوڵ بێزار گەردی بەوە لە حەیرانبێژانی تر جیادەكرێتەوە، كە حەیرانەكانی لە رووی فۆرم و ناوەڕۆك و گوتنەوە تەواوكەری یەكترین، زۆرێك لە حەیرانبێژان بەداخەوە پەیوەست نینە بە یاسا و رێساكانی گوتنی حەیرانەوە، رەسوڵ بێزار گەردی زۆر وەستایانە پەیوەست بووە بەو یاسا و رێسایانە، هەم لەرووی گوتنەوە و هەم لە ڕووی داڕشتنەوە، هەم لە رووی بەخشینی وێنەجوانە هونەریی و كلتوریەكان لە چوارچێوەی حەیرانەكانیدا، بەڵام ئەمانە لای ئەوانی تر كەمتر هەستی پێدەكرێت. رەسوڵ بێزار گەردی لەم بوارەدا زۆر سەركەوتووتر بووە، ئەوەی كە پاڵپشتی ئەو سەركەوتنەی ئەو بووە، كە شارەزا بووە لە بواری مەقامەكاندا، حەیرانیش جۆرێكە لە مەقام. لە راستیدا ئەو نازناوانەی كە دراوەتەپاڵ رەسوڵ بێزار گەردی كە میری حەیران یان پاشای حەیرانە پڕ بە پێستی خۆیەتی، لەبەرئەوەی چ لە رووی دەنگەوە و چ لە رووی شێوازی گوتنەوە و چ لە رووی داڕشتنی حەیرانەوە دەستێكی باڵای هەبووە، یەكێك بووە لە حەیرانبێژە هەرە سەركەوتووەكانی كورد، ئەو تێكستانەی كە دایڕشتوون و لە كتێبەكانیدا چاپیكردوون و بڵاویكردوونەوە حەیرانی تەواو كامڵن.
* عارەب عوسمان دەڵێت: كە گوتت هەولێر واتە رەسوڵ بێزار گەردی، كە گوتت رەسوڵ بێزار گەردی واتە هەولێر، رەسوڵ بێزار گەردی سیمبولی شاری هەولێر و هەموو كوردستانە، بێجگە لەوەی كە هونەرمەند بووە، پێشمەرگەش بووە و چەكی كوردایەتی و شەڕەفی لەشان كردووە، بەداخەوە تا ئێستا هیچی بۆ نەكراوە كە شایستەی بێت وەكو كۆڵەگەیەكی هونەری موزیكی كوردی.
* شێروان بێركۆتی دەڵێت: یادی مامۆستا رەسوڵ بێزار گەردی بەنرخ رادەگرم و سەری نەوازش دادەنەوێنم بۆ ئەم كەڵە هونەرمەندە گەورەیە، من خاڵە رەسوڵ بێزار گەردی ناودەنێم بە (پاشای حەیرانبێژان) و (ئیمبراتۆری حەیرانی كورد)، چونكە مامۆستا رەسوڵ گەردی سەردەمێك حەیرانی بە شێوەیەكی ئەكادیمی لەگەڵ مۆسیقاوە گوتەوە، لەگەڵ رێزم هیچ كەسێك لە حەیرانبێژان خۆیان لەقەرەی ئەم تاقیكردنەوەیە نەدەدا و تۆنی دەنگی خۆیان لەگەڵ مۆسیقا تاقی نەكردبۆوە و نەدەدۆزیەوە بە شێوەیەكی ئەكادیمیانە، جا بۆیە من بە شانازییەوە دەڵێم خاڵە رەسوڵ گەردی پاشای حەیرانی كوردیە.
سه‌رچاوه: ماڵپه‌ڕی ڕۆژنامه‌ی هه‌ولێر
